Búgin Oliy Majlis Nızamshılıq palatasındaǵı Ózbekstan Ekologiyalıq partiyası frakciyasınıń májilisinde “Ózbekstan – 2030” strategiyasın “Qorshaǵan ortalıqtı qorǵaw hám “jasıl” ekonomika jılı”nda ámelge asırıwǵa baylanıslı mámleketlik baǵdarlamanıń birinshi yarım jıllıqta orınlanıwı boyınsha Ministrler Kabinetiniń esabatı tıńlandı.

Frakciya aǵzaları tiykarǵı itibardı partiyanıń programmalıq wazıypalarınan kelip shıqqan halda ekologiya tarawındaǵı wazıypalardıń orınlanıw jaǵdayına qarattı.
Atap ótilgenindey, 2025-jıldıń birinshi yarım jıllıǵında suw resursların únemlew hám qorshaǵan ortalıqtı qorǵawdıń tiykarǵı baǵdarında bir qatar ilajlar ámelge asırılǵan. Sonıń ishinde, irrigaciya sistemasın hám suwdı únemleytuǵın texnologiyalardı rawajlandırıw, tarawdı basqarıwǵa jeke-menshik sektor hám mámleketlik jeke-menshik sheriklik mexanizmlerin keńnen engiziw baǵdarında belgilengen reje kórsetkishlerine tiykarlanıp jámi 6 obekt avtomatlastırılǵan basqarıw sistemasına ótkerildi.
Suw támiynatın jaqsılaw joybarı sheńberinde 864 máhállede 937 qudıq, 443 nasos, 11 meliorativlik tik qudıq, 15 suw obekti, 438 km basımlı qubır, 2 mıń 59 km kanalda betonlaw hám 199,6 km lotok tarmaqlarında qurılıs-ońlaw jumısları ámelge asırıldı.
Májiliste jasıl aymaqlardı keńeytiw baǵdarındaǵı jumıslarǵa da ayrıqsha toqtap ótildi. Sonıń ishinde, Aralboyı regionında ekologiyalıq jaǵdaydı turaqlastırıw, Aral teńiziniń qurıwı nátiyjesinde júzege kelgen ekologiyalıq mashqalalardıń unamsız tásirin jumsartıw baǵdarındaǵı háreketlerge itibar qaratıldı.
Atap ótilgenindey, “Jasıljoybar” joybarlaw institutı tárepinen Qaraqalpaqstan Respublikası Moynaq rayonında 115 mıń gektar, Xorezm wálayatı Topıraqqala rayonında 15 mıń gektar, Nawayı wálayatınıń Tamdı, Uchquduq, Kenimex rayonlarında 60 mıń gektar, Buxara wálayatınıń Alat, Qarakól, Jandar, Romitan, Peshku, Shofirkon, Ǵijduwan, Qarawılbazar rayonlarında 58 mıń gektar “jasıl qaplamalar”dı qurıw ushın jer maydanları tańlap alınıp, “jasıl qaplamalar”dı qurıw boyınsha jol kartaları islep shıǵılǵanı aytıp ótildi.
Frakciya aǵzaları mámleketlik baǵdarlamada ekologiya baǵdarında názerde tutılǵan ayırım wazıypalardıń keshigip atırǵanı, ayırımlarınıń basqa múddetke kóshirilgeni sıyaqlı máselelerdi qızǵın dodaladı.

ÓzA