Ayırım kategoriyadaǵı shańaraqlardıń perzentlerin qabıl etken shańaraqlıq mámleketlik emes mektepke shekemgi bilimlendiriw shólkemlerine usı balalardıń támiynatı ushın ata-analar tóleminiń bir bólegin Mámleketlik byudjetten qaplap beriw rejelestirilmekte.

Mektepke shekemgi hám mektep bilimlendiriwi ministrliginiń tiyisli qararınıń joybarında keltiriliwinshe, “Sociallıq qorǵawdıń birden-bir reestri” málimleme sisteması hám “Kámbaǵal shańaraqlar reestri” málimleme blogına kirgizilgen shańaraqlar, 2026-jıl 1-yanvardan bolsa tek ǵana “Kámbaǵal shańaraqlar reestri” málimleme blogına kirgizilgen shańaraqlardıń perzentlerin qabıl etken shańaraqlıq mámleketlik emes mektepke shekemgi bilimlendiriw shólkemlerine usı balalardıń támiynatı ushın ata-analar tóleminiń 40 procenti byudjetten qaplap beriledi.
Onda usı kategoriyadaǵı shańaraqlardıń perzentleri haqqındaǵı maǵlıwmatlar “Balalar baqshası” mektepke shekemgi bilimlendiriwdi basqarıw málimleme sistemasında “Sanlı húkimet” sistemasınıń uyımlararalıq integraciyalasıw platforması arqalı qáliplestiriledi hám “Mámleketlik emes mektepke shekemgi bilimlendiriw shólkemlerin basqarıw” málimleme sistemasına uzatıladı.
Kompensaciya tólenetuǵın ayırım kategoriyadaǵı shańaraqlardıń perzentleriniń dizimi málimleme sisteması tárepinen avtomat túrde tiyisli tártipte anıqlanadı.
Bul qarardıń qabıl etiliwi 2024-jıl 24-dekabrdegi ÓRN-1011-sanlı Nızamına muwapıq qayta bólistiriletuǵın qarjılar esabınan mámleketlik-jeke menshik sheriklik tiykarında shólkemlestirilgen mektepke shekemgi bilimlendiriw shólkemlerine subsidiyalar ushın ajıratılǵan 3,8 trillion sum sheńberinde ámelge asırıladı.
Esletip ótemiz, aldınıraq, Húkimettiń 484-sanlı qararı qabıl etilgen bolıp, onda Kámbaǵal shańaraqlar reestrine kirgizilgen hám rásmiy bánt bolǵan jalǵız ana (ata) lardıń mektepke shekemgi bilimlendiriw shólkeminde tárbiyalanıp atırǵan 3 jasqa shekemgi perzenti (perzentleri) ne BEMniń 1,5 esesine shekemgi muǵdarda pul qarjıları tólep beriletuǵın aytılǵan edi.

Qaraqalpaqstan xabar agentligi