Milliy statistika komitetiniń maǵlıwmatlarına bola, 2025-jıldıń yanvar-iyun aylarında Ózbekstan Respublikası 17 sırt mámleketke ulıwma bahası 4,4 million AQSh dollarına teń bolǵan 14 mıń tonna qawın eksport etken. Bul nátiyje ótken jıldıń usı dáwirine salıstırǵanda 8 mıń tonnaǵa kóp bolıp, mámlekettiń miywe-ovoщ eksportındaǵı potencialı artıp atırǵanın kórsetedi.

Qawın eksportınıń artıwına bir neshe áhmiyetli faktorlar tásir etti. Mısalı, klimat sharayatınıń qolaylıǵı hám erte ónim alıw imkaniyatı. Qalaberdi, awıl xojalıǵı ónimlerin jetistiriwde agrotexnologiyalardıń keńnen qollanılıwı hám logistika sistemasınıń jaqsılanıwı. Eksportqa qolaylı sortlardıń jetistiriliwi hám sapaǵa bolǵan itibar da sawda kólemin keńeytti.
Eksport quramına qaralǵanda, qawın eksportınıń tiykarǵı úlesi qońsı hám Evropa mámleketlerine tuwra kelmekte:
Rossiyaǵa – 5 600 tonna;
Qazaqstanǵa – 4 000 tonna;
Qırǵızstanǵa – 3 000 tonna;
Latviyaǵa – 603 tonna;
Ukrainaǵa – 515 tonna;
Germaniyaǵa – 254 tonna;
Belarusqa – 249 tonna;
Litvaǵa – 153 tonna;
Basqa mámleketlerge – 84 tonna
Rossiya bazarı, ádettegidey, tiykarǵı qarıydar bolıp qalmaqta – jámi eksporttıń 30 procentten aslamı usı mámleketke tuwra kelgen. Bul bolsa Ózbekstan ushın Rossiya bazarınıń strategiyalıq áhmiyetin jáne bir márte tastıyıqlaydı.
Qazaqstan hám Qırǵızstan sıyaqlı qońsı mámleketlerge eksport kóleminiń joqarılıǵı transport qárejetleriniń tómenligi hám turaqlı sawda baylanıslarınıń bar ekenligi menen túsindiriledi.
Bunnan tısqarı, Latviya, Germaniya hám Litva sıyaqlı Evropa mámleketleriniń dizimde bolıwı Ózbekstannıń qawın jetistiriwde xalıqaralıq standartlarǵa sáykes keletuǵının ańlatadı. Evropa bazarları sapa, sertifikatlaw hám gigiena baǵdarında oǵada talapshań bolıp esaplanadı.
Ótken jılǵa salıstırǵanda 8 mıń tonnaǵa ósiw tek ǵana eksport kóleminiń keńeygenin emes, al óndiris kóleminiń artqanın hám qawın jetistiriwshiler menen eksportshılar arasında birge islesiw kúsheygenin bildiredi.
Ózbekstan 2025-jıldıń birinshi yarımında qawın eksportın keskin arttırıwǵa eristi. Bul ósiw mámlekettiń awıl xojalıǵında alıp barılıp atırǵan reformalar, ónimniń sapasına bolǵan itibardıń nátiyjesi bolıp esaplanadı. Keleshekte bul tendenciyanı saqlap qalıw ushın innovaciyalıq qatnas hám global bazarlarda básekige shıdamlılıqtı támiyinlew áhmiyetli wazıypa bolıp qalmaqta.

Dildora DWSMATOVA,
ÓzA