Joqarı bilimlendiriw, ilim hám innovaciyalar ministrligi baspasóz xızmetiniń málim etiwinshe, kásiplik bilimlendiriw shólkemlerine keminde ulıwma orta maǵlıwmat tiykarında baslanǵısh, orta hám orta arnawlı kásiplik bilimlendiriw baǵdarlamaları boyınsha kúndizgi, keshki hám dual tálim túrlerine abiturientlerdiń hújjetleri ministrliktiń my.edu.uz platforması arqalı 2025-jıl 10-sentyabrge shekem (sol kúni de) qabıl etiledi.

Atap ótilgenindey, medicina texnikumlarına oqıwǵa kiriw tileginde bolǵan abiturientler joqarı bilimlendiriw mákemelerine tańlaw nátiyjeleri járiyalanǵan kúnnen baslap 10 kún ishinde, tiyisli qánigelik hám bilimlendiriw tilin tańlaǵan halda tańlawda qatnasıw ushın dizimnen ótedi.
Basqa texnikumlar (keminde ulıwma orta maǵlıwmat tiykarında) boyınsha kiriw imtixanları jazba imtixan túrinde ótkeriledi. 2025-2026-oqıw jılı ushın keminde ulıwma orta maǵlıwmat tiykarında 549 texnikumǵa jámi 143 mıń 114 (sonnan 66 mıń 484 mámleketlik grant) qabıllaw parametrleri tastıyıqlanǵan.
Kúndizgi bilimlendiriwde – 102 mıń 194 (49 mıń 234 mámleketlik grant), keshki bilimlendiriwde – 2 mıń 250 hám dual bilimlendiriw túrinde – 38 mıń 670 (17 250 mámleketlik grant) ajıratılǵan.

ÓzA