Ózbekstan Sawda-sanaat palatası Sırtqı ekonomikalıq jumıs departamentiniń baslıǵı Saidkomil Saidnazirhanov basshılıǵındaǵı delegaciya Qıtay Xalıq Respublikasınıń Shinjon sanaat qırılıs korpusı wákilleri menen ushırasıw ótkerdi.

Shinjon sanaat qurılıs korpusı 1954-jılı shólkemlestirilgen melioraciya, shegaranı qorǵaw hám ekonomikanı rawajlandırıw menen shuǵıllanıwshı arnawlı struktura ekenligin atap ótiw zárúr. Korpus quramında 14 bólim, 22 rawajlanıw aymaǵı hám 3 million 600 mıń xızmetker jumıs isleydi.
Sóylesiw delegaciya basshısı – Shinjon sanaat qurılıs korpusı komissarınıń orınbasarı Lyu CHjungo eki mámleket arasındaǵı qatnasıqlardı keńeytiw máselelrine toqtap, qurılıs, awıl xojalıǵı, toqımashılıq, turizm, programmalastırıw hám málimleme texnologiya tarawlarında birgeliktegi joybarlardıń ámelge asırılıwı rejelestirilip atırǵanın málim etti.
Ózbekstan tárepi óz gezeginde mámleketimizdegi investiciya imkaniyatları hám jaratılǵan qolaylı ortalıq haqqında maǵlıwmat berdi. Sawda-sanaat palatası málimleme xızmetiniń xabarına bola, keleshekte qıtaylı birge islesiwshiler menen sawda-ekonomikalıq birge islesiwdi jáne de rawajlandırıw boyınsha kelisimge erisildi.

B.Xudoyberdiev, ÓzA muxbiri