Usı jıl 14-15-avgust kúnleri Tashkentte “Oraylıq Aziya – isenim, qáwipsizlik hám turaqlı rawajlanıwdıń ulıwma mákanı” atamasında VIII Oraylıq Aziya ekspertler forumı (OAEF) bolıp ótedi.

2018-jılı shólkemlestirilgen OAEF hár jılı Oraylıq Aziya mámleketleri basshılarınıń Másláhát ushırasıwına basshılıq etip atırǵan mámlekette ótkeriledi. Forum regionallıq birge islesiwdiń házirgi jaǵdayı hám perspektivaların dodalaw ushın áhmiyetli maydan wazıypasın atqaradı hám Oraylıq Aziya mámleketleriniń óz-ara baylanısların bunnan bılay da rawajlandırıw boyınsha usınıslar islep shıǵadı.
Forum Ózbekstan Respublikası Prezidenti janındaǵı Strategiyalıq hám regionlararalıq izertlewler institutı (SRII) tárepinen shólkemlestirilmekte. Ilaj sherikleri – BMShtıń Oraylıq Aziyada preventiv diplomatiya boyınsha regionallıq orayı, Evropa Awqamınıń Ózbekstandaǵı wákilxanası hám Evropada qáwipsizlik hám birge islesiw shólkemi (EQBSh), Konrad Adenauer atındaǵı qor.
Forumda Oraylıq Aziyadan dástúriy túrde region mámleketleriniń strategiyalıq institutları, ilimiy-izertlew oraylarınıń basshıları jáne qánigeleri hám akademiyalıq toparlardıń wákilleri qatnasadı. Birinshi márte ilajǵa regionologiyalıq tájiriybe almasıw maqsetinde Evropa Awqamı, Qubla-Shıǵıs Aziya mámleketleri awqamı (ASEAN), Arqa keńes mámleketlerinen abıraylı ekspertler, sonday-aq, Rossiya Federaciyası, AQSh, Ullı Britaniya, Shveycariya hám Ázerbayjannan izertlewshiler mirát etilgen.
Forumnıń keń kólemli baǵdarlaması regionallıq birge islesiwdi tereńlestiriw perspektivaların kórip shıǵıw hám kóp táreplemeli baylanıslardı alǵa qoyıw boyınsha anıq ilajlardı belgilewdi óz ishine aladı.
Bunnan tısqarı, Forum sheńberinde óz aldına ilajlar ótkeriledi: regionallıq ózine tánlikti qáliplestiriwdiń ámeliy jaqları boyınsha ilimiy-ámeliy konferenciya jáne “Oraylıq Aziya – Arqa Evropa” formatındaǵı birge islesiwdi rawajlandırıw perspektivalarına baǵıshlanǵan dógerek sáwbeti bolıp ótedi.
Bolajaq ekspertler sóylesiwi mápler soqlıǵısqan noqatlardı anıqlaw hám Oraylıq Aziyanıń keleshektegi rawajlanıw baǵdarların belgilep beriwi kútilmekte. Islep shıǵılǵan usınıslar usı jılı Ózbekstanda ótkeriliwi rejelestirilgen Oraylıq Aziya mámleketleri basshılarınıń gezektegi Másláhát ushırasıwınıń kún tártibin bayıtıwǵa áhmiyetli úles qosadı.

ÓzA