Ózbekstan Respublikası Prezidenti “Miynet qatnasıqları hám kásipke tayarlaw sistemasın jetilistiriwge baylanıslı qosımsha ilajlar haqqında”ǵı pármanǵa qol qoydı.

Oǵan muwapıq, tómendegiler miynet qatnasıqları hám kásipke oqıtıw sistemasın jetilistiriwdiń tiykarǵı baǵdarları hám maqsetleri etip belgilendi:
a) xızmetker hám jumıs beriwshi arasındaǵı miynet qatnasıqlarınıń nátiyjeli, ádil hám óz-ara paydalı sistemasın jaratıw;
b) kásipke oqıtıw menen bir qatarda mamanlıq arttırıw sistemasın, sonıń ishinde, jeke menshik sektordıń qatnasıwında engiziw;
v) jumıs beriwshilerdiń mútájligine muwapıq olardı maman kadrlar menen támiyinlew sistemasın engiziw;
g) insan resursların basqarıw hám miynetti qorǵaw tarawın rawajlandırıw.
Párman menen 2025-jıl 1-sentyabrden baslap jumıs beriwshiler ushın belgilengen tómendegi talaplar biykar etiledi:
a) bos jumıs orınlarına bántlik uyımları tárepinen jiberiletuǵın shaxslardı jumısqa qabıl etpegenligi ushın hákimshilik juwapkershilik;
b) bos jumıs orınları bar ekenligi haqqındaǵı esabatlardı májbúriy usınıw.
2025-jıl 1-noyabrden baslap:
a) xojalıq júrgiziwshi subektler tek ǵana mayıplıǵı bolǵan shaxslar, shańaraqlıq (turmıslıq) zorlıqtan jábirlengen shaxslar, Kámbaǵal shańaraqlar reestrindegi shańaraqlardıń aǵzaları, alternativ jaylastırıw túrlerinde tárbiyalanǵan jetim shaxslar, ata-ana qaramaǵınan ayırılǵan shaxslar ushın jumıs orınlarınıń májbúriy rezervlerin qáliplestiredi;
b) byudjet shólkemleri hám mámleketlik úlesi 50 procentten joqarı bolǵan kárxanalar tek ǵana mayıplıǵı bolǵan shaxslar, shańaraqlıq (turmıslıq) zorlıqtan jábirlengen shaxslar, Kámbaǵal shańaraqlar reestrindegi shańaraqlardıń aǵzaları, alternativ jaylastırıw túrlerinde tárbiyalanǵan jetimler, ata-ana qaramaǵınan ayırılǵan shaxslar, jazanı orınlaw mákemelerinen azat etilgen hám adam sawdasınan jábirlengen shaxslar ushın jumıs orınlarınıń májbúriy rezervlerin qáliplestiredi;
v) bántlik uyımları rezervtegi jumıs orınlarına jollamalardı shólkemlerdiń dizimdegi gezegi boyınsha beredi;
e) jollamalardı beriwde mayıplıǵı bolǵan shaxslardıń jasaw mánziline jaqınlıǵı hám shólkemlerde jumıs alıp barıp atırǵan xalıqtıń sociallıq járdemge mútáj kategoriyasınan bolǵan xızmetkerlerdiń ámeldegi sanı inabatqa alınadı;
g) xızmetkerleriniń sanı 50 adamǵa shekem bolǵan isbilermenlik subektlerine de mikrofirmalar kategoriyasına kirgizilgen jumıs beriwshiler ushın Miynet kodeksiniń 29-babında belgilengen xızmetkerlerdiń miynetin huqıqıy jaqtan tártipke salıwdıń ózine tán ózgeshelikleri qollanıladı;
d) jumıssızlıq napaqası tek ǵana miynet shártnaması biykar etilgen shaxslarǵa tólenedi;
j) jumıssızlıq napaqasın alıwshı shaxs bántlik uyımları tárepinen jiberilgen yamasa járiyalanǵan bos jumıs orınlarına sáwbetlesiwge barmaǵan yaki usınıs etilgen maqul jumıstan bas tartqan jaǵdayda napaqa tólemi keyingi aydıń birinshi sánesinen toqtatıladı.
2026-jıl 1-yanvarǵa shekem dáslep Tashkent qalasında hám keleshekte respublikanıń barlıq aymaqlarında jumıs beriwshilerge ámeliy bilim hám kónlikpelerge iye qánigelerdi tawıp beriwde bántlik uyımları tárepinen járdemlesiw sisteması engiziledi.
2025-jıl 1-sentyabrden baslap xızmet kórsetiw, awıl xojalıǵı hám qurılıs tarawında jumıs alıp barıp atırǵan xojalıq júrgiziwshi subektlerge xızmetkerleriniń sanı 50 ge shekem bolǵan xızmet kórsetiw, awıl xojalıǵı hám qurılıs tarawında jumıs alıp barıp atırǵan xojalıq júrgiziwshi subektlerge BMMSda biometrikalıq identifikaciyalaw (Face-ID) arqalı elektron miynet shártnamaların dúziw hám biykarlawdı rásmiylestiriwge ruxsat beriledi.
Shólkem saplastırılǵanlıǵı yamasa jumıs alıp barmay atırǵanlıǵı sebepli jumıs beriwshi menen miynet shártnamasın biykarlaw imkaniyatı bolmaǵan jaǵdayda, “Birden-bir milliy miynet sisteması” direkciyasına puqaranıń múrájatına tiykarlanıp miynet qatnasıqlarınıń haqıyqattan da tamamlanǵanlıǵı haqqındaǵı jazıwlardı BMMSǵa kirgiziw wákilligi beriledi.
2025-jıl 1-sentyabrden baslap mámleketlik miynet inspektorları tárepinen ótkeriletuǵın tekseriwler haqqında wákillikli uyımdı aldınnan xabardar etiw tártibi biykar etiledi. Sonday-aq, “Qáwip-qáterdi tallaw” sistemasınıń tallaw nátiyjelerine tiykarlanıp ótkeriletuǵın tekseriwlerdiń baslanıwı haqqında keminde 10 jumıs kúni aldın isbilermenlik subektin xabardar etiw tártibi mámleketlik miynet inspektorları tárepinen ótkeriletuǵın tekseriwlerge engizilmeydi.
2026-jıl 1-yanvardan baslap BMMS arqalı dizimge alınǵan miynet nızamshılıǵınıń buzılıwın jumıs beriwshiniń qatnasıwısız kórip shıǵıw hám nızam buzılıw jaǵdayları boyınsha elektron hákimshilik qarar qabıl etiw sisteması engiziledi.

ÓzA