Bıyıl oktyabr ayınıń sońǵı kúnlerinen noyabr ayınıń birinshi yarımına shekem Samarqand qalasında BMShtıń Bilimlendiriw, ilim hám mádeniyat máseleleri boyınsha shólkemi (YuNESKO) Bas konferenciyasınıń 43-sessiyası ótkeriledi.

Sońǵı 40 jıl ishinde birinshi márte YuNESKOnıń Parij qalasındaǵı rezidenciyasınan basqa jerde ótkeriliwi belgilengen bul waqıya shólkemniń 80 jıllıǵına tuwra kelgeni menen de áhmiyetli.
Mámleketimiz basshısınıń 2024-jıl 15-marttaǵı qararına bola, bul ilajǵa tayarlıq kóriw boyınsha shólkemlestiriw komiteti dúzilip, kerekli ilajlar ámelge asırılmaqta.
Shólkemlestiriw komiteti tárepinen sessiyaǵa baylanıslı ilajlardı shólkemlestiriw hám ótkeriw boyınsha jumısshı toparlar dúzilip, tayarlıq jumısları alıp barılmaqta. Sessiya qatnasıwshılarınıń keliwi hám ketiwi, olarǵa viza rásmiylestiriw, transport hám medicinalıq xızmetler kórsetiw, tiykarǵı ilajlar hám mádeniy baǵdarlamalarda qatnasıwı máseleleri YuNESKO menen kelisilgen halda sheshilmekte.
Usı jıldıń 12-mart kúni Prezident Shavkat Mirziyoev Franciyaǵa mámleketlik saparı sheńberinde YuNESKO bas direktorı Odri Azuleni qabıl etip, shólkem Bas konferenciyasınıń 43-sessiyasına tayarlıq kóriw hám onı ótkeriwdiń ámeliy jaqların dodalaǵan edi.
Sessiya hám tiykarǵı ilajlar “Silk Road Samarkand” turistlik kompleksinde ótkeriledi.
Maǵlıwmatlarǵa bola, 43-sessiya hám onıń sheńberindegi ilajlarda 194 mámleketten 5 mıńnan aslam qatnasıwshı keliwi kútilmekte. Tek ǵana YuNESKO sekretariatınan 400 xızmetker keledi. Sonday-aq, mámleket basshıları, xalıqaralıq shólkemlerdiń jetekshileri, ministrler hám elshiler Samarqandta jıynaladı. Házirshe úsh mámleket basshısı, sonıń ishinde, Qazaqstan Prezidenti sessiyada qatnasıw tilegin bildirgen.
Abıraylı delegaciyalar, ilaj qatnasıwshıların jaylastırıw ushın “Silk Road Samarkand”kompleksindegi 8 miymanxanada 1176 xana, Samarqand qalasındaǵı 130 miymanxanada 4178 xana ajıratılıp, forum kúnleri ushın bánt etip qoyılǵan.
Bunnan tısqarı, Tashkent, Buxara, Xiywa hám Shahrisabzda mádeniy ilajlar, ekskursiyalar hám qabıllawlar ótkeriletuǵının esapqa alıp, bul qalalarda da miymanxanalar tańlanǵan, delegaciyalarǵa transport hám basqa da xızmetler kórsetiliwi boyınsha kerekli ilajlar kórilmekte.
Sessiya sheńberinde YuNESKOnıń Jaslar forumı, milliy komissiyalar májilisi, birinshi márte Beruniy atındaǵı Ózbekstan-YuNESKO sıylıǵın tapsırıw máresimi, muzeylerde jasalma intellekttiń ornı boyınsha xalıqaralıq konferenciya ótkeriledi. Bunnan tısqarı, Samarqandtaǵı tariyxıy-mádeniy estelikler, muzeyler, mádeniyat orınlarında xalıqaralıq kórgizbeler, jańa ekspoziciyalardıń prezentaciyası, dúnya juldızlarınıń qatnasıwında koncert baǵdarlamaları, ulıwma 150 den aslam ilaj rejelestirilgen.
43-sessiya hám basqa da ilajlardı sáwlelendiriw ushın Samarqandqa keletuǵın jergilikli hám sırt el ǵalaba xabar quralların belgilengen tártipte akkreditaciyadan ótkeriw hám olarǵa zárúr sharayat jaratıw boyınsha da ilajlar kórilmekte. “Silk Road Samarkand” kompleksi aymaǵında baspasóz orayı shólkemlestiriledi.

ÓzA