Jámiyette insan mápleri birinshi orında turadı. Sonıń ushın da mámleketlik uyımlar xalıq penen tikkeley baylanısta bolıp, puqaralardıń mashqalalarına sheshim tabıwǵa háreket etpekte.

Tórtkúl rayonında hár hápteniń siyshembi hám juma kúnleri rayon hákimi tárepinen puqaralar qabıllawı shólkemlestiriledi. Hákimniń tikkeley xalıq penen ushırasıwları azanǵı saat 08:00 den 09:00 ge shekem bolıp ótedi. Bul qabıllawlarda orınlardaǵı mashqalalar hám xalıqtı oylandırıp atırǵan máseleler boyınsha múrájatlar úyrenilip, tiyisli ilajlar kóriledi, – dep maǵlıwmat beredi rayon hákimligi Málimleme xızmeti bólimi.
Rayon hákimi I.Xudaybergenov tárepinen gezektegi qabıllaw Xalıq qabıllawxanası imaratında ótkerildi. Qabıllaw dawamında hár qıylı baǵdarlardaǵı múrájatlar kórip shıǵıldı hám hár bir másele boyınsha juwapkerlerdiń qatnasıwında dodalawlar ótkerildi.
Puqaralar tárepinen jumıssızlıq máselesi, kadastr hújjetlerin rásmiylestiriw hám durıslaw, sociallıq járdem, huqıqıy másláhát, turaq jaylardı ońlawda járdem beriw, emleniw ushın dári-dármaq penen támiyinlew sıyaqlı baǵdarlarda múrájatlar bildirildi. Hár bir múrájat boyınsha ornında úyreniw jumısları alıp barılıp, juwapker shólkemlerge anıq tapsırmalar berildi.

Qaraqalpaqstan xabar agentligi