Jaslar isleri agentligi hám Respublikalıq Ruwxıy-aǵartıwshılıq orayı tárepinen mámleketimiz ǵárezsizliginiń 34 jıllıǵı múnásibeti menen sıylıq qorı 170 million sum bolǵan “Ózbekstan mende jasaydı” milliy kontentler tańlawına start berildi.

Watanǵa muhabbat, qádiriyatlar, watanǵa mehir sáwlelengen kreativ fotolar toplamı yamasa videokontentlerdi keńnen dodalaw hám olardı xoshametlew maqsetinde shólkemlestirilgen tańlawda jeńimpazlar “Eń jaqsı videorolik”, “SI járdeminde tayarlanǵan eń jaqsı videorolik”, “Eń kóp dawıs jıynaǵan videorolik” hám “Eń jaqsı súwretler toplamı” nominaciyalarında anıqlanadı.
Tańlaw jeńimpazları tómendegishe sıylıqlanadı. Sonıń ishinde, “Eń jaqsı videorolik” nominaciyası boyınsha 1-orınǵa 30 million sum, 2-orınǵa 20 million sum hám 3-orınǵa 15 million sum beriledi.
“SI járdeminde tayarlanǵan eń jaqsı videorolik” nominaciyası boyınsha 1-orın 20 million sum, 2-orın – 15 million sum, 3-orın – 10 million sum menen xoshametlenedi.
Sonday-aq, “Eń jaqsı súwretler toplamı” nominaciyası ushın 1-orınǵa 10 million sum, 2-orınǵa 8 million sum, 3-orınǵa 5 million sum beriledi.
“Eń kóp dawıs jıynaǵan videorolik” nominaciyası boyınsha bolsa 1-orın ushın 15 million sum, 2-orın ushın 12 million sum, 3-orın ushın 10 million sum ajıratıladı.
Tańlawda jumıslar tómendegi kriteriyalar tiykarında bahalanadı:
-temanıń mazmun-mánisi ashıp berilgenligi,
-súwret, dawıs hám montajlaw jumısınıń sapası,
-avtordıń kontent jaratıwdaǵı ózine tán dóretiwshilik kózqarası, -kreativligi,
-jumıstıń plagiat emesligi,
-kontenttiń barlıq kategoriyadaǵı paydalanıwshılar ushın mólsherlengen bolıwı,
-videoroliklerde jasap atırǵan aymaǵı haqqında qatnasıwshınıń tikkeley ózi aytıp beriwi,
-jiberilgen jumıslar aldın hesh jerde járiyalanbaǵan bolıwına da áhmiyet beriledi.
Juwapkerlerdiń atap ótiwinshe, videorolikler 60 sekundtan aspawı shárt. Tańlawda qatnasıwshılardıń jası sheklenbegen.

Gulnoza Boboeva,
ÓzA