Prezident Shavkat Mirziyoevtiń basshılıǵında joqarı oqıw orınları pitkeriwshilerin jumısqa jaylastırıw boyınsha keńeytilgen májilis dawam etpekte.

Mámleketimiz basshısı rektorlardıń wákilligin keńeytiw hám juwapkershiligin arttırıw boyınsha jańa sistema engiziw zárúr ekenligin atap ótti.
Endi “Jańa Ózbekstan” universitetiniń bahalaw sisteması basqa joqarı oqıw orınlarında da jolǵa qoyıladı.
Qarjılandırıw joqarı oqıw orınları toplaǵan ballarına qarap ámelge asırıladı.
Joqarı oqıw orınlarına pitkeriwshilerdiń bántligine qarap – 40 ball, ilimiy izertlewler ushın tarmaq buyırtpası hám ónimin satıwına qarap – 30 ball, ilimiy potencialı, tán alınǵan xalıqaralıq jurnallardaǵı maqalaları ushın – 20 ball; izertlewler ushın tartqan jergilikli hám sırt el grantı ushın 10 ballǵa shekem beriledi.
Máselen, Qarshı texnika universiteti jámi ballardıń 85 procentin toplasa, bıyılǵı byudjetten berilip atırǵan 78 milliard sumǵa qosımsha 20 procentlik bonus beriledi. Eger 56 procentten az toplasa, keyingi oqıw jılına qarjılandırıw qısqaradı.
Milliy universitet, Irrigaciya sıyaqlı ilimiy joqarı oqıw orınları, Mádeniyat hám kórkem óner, Konservatoriya sıyaqlı sociallıq joqarı oqıw orınların texnika baǵdarındaǵı ámeliy joqarı oqıw orınları menen teńlestirip bolmaytuǵını atap ótildi.
Usı múnásibet penen juwapkerlerge reyting ólshemlerin islep shıǵıwda bunı da esapqa alıw tapsırıldı.

ÓzA