«Bir mákan – bir jol» baslaması ámelde

Qıtaydıń “Alashankou” erkin sawda zonası arqalı Ózbekstannan tiykarınan keptirilgen miyweler importı ámelge asırılmaqta, dep xabar bermekte “Dunyo” MA.

Xabarda jazılıwınsha, bul ekonomikalıq zonada Qıtayǵa alıp kirilip atırǵan hám eksport etilip atırǵan ónimlerdi jetkerip beriw, on túrdegi ónimlerge sertifikatlar beriw, bajıxanaǵa baylanıslı hújjetlerdi rásmiylestiriw hám logistika xızmetleri boyınsha ámeliy járdem kórsetiledi.
Sonday-aq, ekonomikalıq zonada isbilermenler tárepinen bir neshe iri qoymaxanalar shólkemlestirilgen. Olar ónimlerdi saqlaw, júklew hám hújjetlerdi rásmiylestiriwge járdemlesedi.
Bul iri kompleks 2011-jılı «Bir mákan – bir jol» baslaması sheńberinde shólkemlestirilgen. Bul jerden ónimler Qıtaydan Evropaǵa hám Qıtaydan Oraylıq Aziya mámleketlerine, sonıń ishinde, Ózbekstanǵa jetkerip beriledi.
Ónimler tiykarınan poezd hám júk avtomobillerinde tasıladı. Atap aytqanda, 2024-jılı poezd arqalı 7684 tasıwlar ámelge asırıldı. Bul sanlar 2023-jılǵa salıstırǵanda derlik 16 procentke kóp. Sonday-aq, sırt elden kirgen 40 million tonna ónim Qıtay aymaqlarına jetkerip berilgen.
«Ózbekstannan tiykarınan keptirilgen miyweler hám tawıq ayaqları eksport etilmekte, – dedi Alashankou qalası hákiminiń orınbasarı Shu Sheng CHiang. – Bul sanlar júdá az. Olar eki mámlekettiń potencialına juwap bermeydi. Biz ózbekstanlı isbilermenler menen sheriklikti keńeytiwge tayarmız. Ózbekstanlı sheriklerimizdiń usınısların tıńlawǵa hám olarǵa Qıtay bazarlarına kiriwine járdem beriwimiz múmkin. Máselen, biz paldı Rossiyadan alıp kelip atırmız. Biliwimshe, Ózbekstan palı da júdá mazalı hám ótimli. Ózbekstan isbilermenleri pal ónimlerin zaman talapları tiykarında qadaqlap eksport etse, biz olar ushın Qıtay bazarınan qarıydar tabıwǵa járdemlesemiz,” – dedi Alashankou qalası hákiminiń orınbasarı Shu Sheng CHiang. “Alashankou” erkin sawda zonası menen tanısıw dawamında ónimler saqlanıp atırǵan qoymaxanalar, júklerdi túsiriw, qadaqlaw hám júklew xızmetleri kózden ótkerildi», delinedi xabarda.

Qaraqalpaqstan xabar agentligi