múnásibet

Sońǵı segiz jılda Ózbekstan zamanagóy transport koridorları hám logistika sheshimlerin rawajlandırıw boyınsha xalıqaralıq háreketlerde belsene qatnaspaqta. Mámlekette turaqlı transport-logistika infrastrukturasın qáliplestiriw, sawda baǵdarların diversifikaciyalaw hám regionallıq birge islesiwdi bekkemlew boyınsha kompleksli ilajlar nátiyjeli ámelge asırılmaqta.
Sonıń ishinde, usı jılı birge islesiwshiler menen “Qıtay – Qırǵızstan – Ózbekstan” temir jolınıń qurılısı baslandı, “Ózbekstan – Túrkmenstan – Iran – Túrkiya” transport koridorı arqalı júk tasıw kólemi sezilerli dárejede arttı. Xalıqaralıq transport koridorları hám infrastrukturasın jedel rawajlandırıw ushın óz-ara muwapıqlasqan háreketler dawam etpekte. Bunı “Ózbekstan – Awǵanstan – Pakistan” temir jolın qurıw joybarın ámelge asırıwdı jedellestiriw hám onı qurılıp atırǵan “Qıtay – Qırǵızstan – Ózbekstan” temir jol magistralı menen tutastırıw joybarı mısalında da kóriw múmkin.
Ózbekstan Prezidentiniń Túrkmenbashı qalasındaǵı “Avaza” milliy turizm aymaǵında bolıp ótken BMShtıń Teńizge shıǵıw imkaniyatı bolmaǵan rawajlanıp atırǵan mámleketler boyınsha úshinshi konferenciyasına qatnasıwı hám onda mámleketimiz basshısı tárepinen alǵa qoyılǵan usınıs hám baslamalar keleshekte xalıqaralıq birge islesiwdiń rawajlanıwına jáne Oraylıq Aziyada tınıshlıq hám abadanlıqtı bekkemlewge úlken úles qosatuǵını menen jáne de áhmiyetli bolıp esaplanadı.
Sonday-aq, mámleketimizdiń kóp vektorlı transport strategiyası álle qashan óziniń anıq nátiyjelerin bere baslaǵan. Tranzit kólemi artıp barmaqta, Ózbekstannıń Evroaziya tiykarǵı logistika orayı sıpatındaǵı roli bekkemlenbekte. Teńizge tikkeley shıǵıw imkaniyatı joq ekenine qaramastan, mámleket geografiyalıq sheklewlerdi tabıslı jeńip, olardı globallıq jáhán ekonomikasına integraciyalaw jolında strategiyalıq ústinlikke aylandırmaqta.
Sonıń ishinde, 2025-jıl aprel ayında Samarqandta bolıp ótken “Evropa Awqamı – Oraylıq Aziya” sammitinde jańa strategiyalıq “jol kartası” qabıl etilgen edi. Onıń maqseti de regionnıń EA menen transport hám shiyki zat integraciyasın kúsheytiw hám Transkaspiy koridorı arqalı dúnya bazarlarına qáwipsiz shıǵıwdı támiyinlewden ibarat. Sonlıqtan, bul maqset hám “jol kartası” da Avaza siyasiy deklaraciyasına únles bolıp esaplanadı.
Sonıń menen birge, Túrkmenstanda ótkerilgen ushırasıwlar Oraylıq Aziya mámleketleri ushın áhmiyetli waqıya boldı. Bul ushırasıwlarda region jetekshileri óz-ara sóylesiw alıp bardı hám bul arqalı qońsıshılıq, ekonomikalıq birge islesiw hám qáwipsizlik baǵdarındaǵı qatnasıqlar jáne de bekkemlendi. Áne, usınday sapar etiwler arqalı biz, regiondaǵı qońsı mámleketler, bir-birimizdi jaqsı túsinemiz hám keleshektegi rawajlanıw ushın ulıwmalıq baǵdarlardı belgilep alamız. Usı kózqarastan qaraǵanda, Ázerbayjannıń bul sóylesiwlerge qosılıwı oǵada úlken áhmiyetke iye. Sebebi ol tek ǵana qońsı mámleket emes, al regionda da áhmiyetli ekonomikalıq orınǵa iye birge islesiwshi bolıp esaplanadı.
Sebebi, Ázerbayjan menen birge islesiw ellerimizdiń ekonomikaları bir-birin tolıqtırıp, óz-ara paydalı qatnasıqlardı rawajlandırıw imkaniyatın beredi. Atap aytqanda, aymaqlıq infrastrukturalardı birgelikte qurıw arqalı tovarlar aylanısın kóbeytiw, aldınǵı tájiriybelerdi úyreniw hám engiziw arqalı awıl xojalıǵın nátiyjeli rawajlandırıw múmkin.
Ulıwma alǵanda, Avaza konferenciyasında Ózbekstan jetekshisi tárepinen logistika tarawın rawajlandırıwǵa baylanıslı anıq baslamalardıń alǵa qoyılıwı Oraylıq Aziya, atap aytqanda, teńizge shıǵıw imkaniyatı bolmaǵan rawajlanıp atırǵan mámleketler ushın strategiyalıq áhmiyetke iye joybarlar bolıp esaplanadı. Sol sebepli, Túrkmenstanda ótkerilgen ushırasıwlardı tek ǵana ámeliy sapar emes, al keleshekke qaratılǵan, anıq maqsetler tiykarında qurılıp atırǵan birge islesiwdiń ayqın úlgisi, dep aytıw múmkin.
Juwmaqlap aytqanda, biz bir-birimizdi qollap-quwatlasaq, birge islesiwdi bekkemlesek hám ulıwma máplerdi gózlesek Oraylıq Aziya hám oǵan tutas mámleketler turaqlı hám rawajlanǵan regionǵa aylanadı.

Gulnoraxon ABDUVOHIDOVA,
Oliy Majlis Nızamshılıq palatasınıń
Miynet, densawlıqtı saqlaw hám sociallıq máseleler komitetiniń aǵzası.

ÓzA