“Qaraqalpaqstan” temir jol shegara bajıxana postı xızmetkerleri tárepinen aymaqta jasawshı puqaralar menen “Korrupciyaǵa qarsı gúresiw bárshemizdiń minnetimiz” atamasında ushırasıw bolıp ótti.

Onda puqaralarǵa bajıxana shegaraların kesip ótiw tártip-qaǵıydaları, tovarlardı bajısız alıp kiriw hám alıp shıǵıw normaları túsindirilip, nızamshılıqta belgilengen tártiplerge qatań ámel etiliwi, qadaǵan etilgen tovarlardı nızamsız túrde alıp ótiwge urınbaw boyınsha úgit-násiyat jumısları alıp barıldı.
Sonday-aq, korrupciya millettiń zawalı esaplanatuǵını, bajıxana shegaraları arqalı háreketlengende nızamshılıq talaplarına qatań ámel etpey, bajıxana xızmetkerine “para” usınıs etiw – jınayıy juwapkershilik ushın tiykar bolatuǵını atap ótildi.
Puqaralarǵa bajıxana xızmetkerleriniń lawazım wákilliklerinen materiallıq yamasa materiallıq emes mápler esabınan paydalanıw, dámegóylik jaǵdaylarına dus kelse, Bajıxana komitetiniń 11-08 hám Qaraqalpaqstan Respublikası Bajıxana basqarmasınıń 61-224-90-86 isenim telefonına qońıraw etiwi soralıp, baylanıs nomerleri kórsetilgen bukletler tarqatıldı.
Bul baǵdardaǵı úgit-násiyat jumısları jolawshı tasıwshı poezdlarında bajıxana shegaraların kesip ótip atırǵan puqaralarǵa da túsinik beriw arqalı dawam ettirilmekte.
Esletip ótemiz, ámeldegi nızamshılıq talapların biliw hám olarǵa ámel etiw bajıxana nızambuzıwshılıǵı menen baylanıslı huqıqbuzarlıqlardıń aldın alıwǵa xızmet etedi.

Qaraqalpaqstan xabar agentligi.