Usı jıldıń birinshi yarımında Meta kompaniyası “WhatsApp” messendjeri arqalı dúnya boylap paydalanıwshılardı nıshanǵa alǵan aldawshılarǵa baylanıslı 6,8 million akkaunttı anıqlap, óshirip tasladı.

Rásmiy bildiriwge bola, bul akkauntlardıń kópshiligi Qubla-Shıǵıs Aziyadaǵı shólkemlesken jınayat orayları menen baylanıslı bolıp, ayırım jaǵdaylarda májbúriy miynet arqalı júrgizilgen.
Meta bul maǵlıwmattı paydalanıwshılar ushın jańa qarsı aldawshılıq ilajı engizilip atırǵanı menen túsindirdi. Jańa qáwipsizlik sisteması baylanıs mánzili diziminde joq paydalanıwshı sizdi toparǵa qosqanda eskertiw beredi.
Bul ilaj sońǵı waqıtta keń tarqalǵan aldawshılıq sistemasına qarsı gúresiwge qaratılǵan. Onda jınayatshı belgili bir akkaunttı ózlestirip aladı yaki qálbeki investiciya sızılması menen baylanıslı toparǵa qosıp, aldawǵa urınadı.
Atap ótilgenindey, “WhatsApp” bul akkauntlardıń kópshiligin aldawshılar tolıq paydalanıwǵa úlgermey turıp anıqlap, bloklap qoyǵan.
Mısalı, Meta hám “ChatGPT” islep shıǵarıwshısı “OpenAI” menen birgelikte Kambodjadaǵı bir aldawshılıq sisteması ashılǵan. Jábirleniwshilerge sociallıq tarmaqta maqullaw (layk basıw) arqalı pul tabıw usınıs etilgen. Tiykarında, bul jalǵan finanslıq piramida edi.
Ádette aldawshı qurbanına dáslep SMS-múrájat jollaydı, soń baylanıstı sociallıq tarmaq yaki messendjer arqalı dawam ettiredi. Kóbinese aldaw procesi kripto yamasa tólem platformasında juwmaqlanadı.
– Eger aldınnan tólem talap etilip atırǵan bolsa, bul aldawshı usıl bolıw itimalı júdá joqarı, – delinedi Meta bayanatında. Kompaniya Qubla-Shıǵıs Aziya, atap aytqanda, Myanma, Kambodja hám Tailandta jumıs alıp barıp atırǵan aldawshılıq orayları qáwpinen eskertken. Bul oraylar adamlardı aldaw jolı menen jallap, májbúriy aldawshılıq penen shuǵıllanıwǵa tartıw jaǵdayları ushıraspaqta.
Aymaqlıq rásmiyler xalıqtı sergek bolıw, “WhatsApp” eki basqıshlı autentifikaciya (two-step verification) funkciyasınan paydalanıwǵa shaqırmaqta.
Metanıń sońǵı háreketleri sanlı aldawshılıqqa qarsı global gúreste áhmiyetli qádem sıpatında bahalanbaqta. Qánigelerdiń pikirinshe, paydalanıwshınıń jeke abaylılıǵı hám sanlı sawatlılıǵı bul baǵdarda elege shekem sheshiwshi faktor bolıp qalmaqta.

ÓzA