Qaraqalpaqstan Respublikası Joqarǵı Keńesiniń Baslıǵı Amanbay Orınbaev Ózbekstan futzal federaciyası prezidenti Bekzod Mamatqulov penen ushırasıw ótkerdi.

Onda mámleketimizde futzal sportın bunnan bılay da rawajlandırıw hám ǵalaba en jaydırıw boyınsha bir qatar áhmiyetli máseleler dodalandı.
Ushırasıw aldında sońǵı jılları mámleketimizde, ásirese, mámleketimiz basshısınıń baslaması menen sport tarawına keńnen jol ashılıp atırǵanı, jaslar arasında sportqa qızıǵıwshılıq kúsheyip atırǵanı ayrıqsha atap ótildi. Atap aytqanda, komandalıq sport túrleri – futbol hám futzalǵa qızıǵıwshılıq artıp, mámleketimiz bayraǵın xalıqaralıq maydanlarda bálent kóteretuǵın sportshılardıń jetisip shıǵıwı ushın zárúr sharayatlar jaratılıp atırǵanı atap ótildi.
Sóylesiw dawamında futbol menen bir qatarda futzaldı da orınlarda keńnen úgit-násiyatlaw, jaslar arasında usı sport túrin ǵalaba eń jaydırıw, hár qıylı jarıslar shólkemlestiriw arqalı talantlardı ashıw áhmiyetli ekenligi atap ótildi. Usı múnásibet penen, Ózbekstan futzal federaciyasınıń Qaraqalpaqstan Respublikasındaǵı aymaqlıq bólimin shólkemlestiriw máselesi de dodalandı.
Tárepler jaratılıp atırǵan imkaniyatlardı esapqa alǵan halda, Qaraqalpaqstanda futzaldı jańa basqıshqa alıp shıǵıw boyınsha bir qatar anıq ilajlardı belgilep aldı. Atap aytqanda, infrastrukturanı jaqsılaw, jaslar ushın arnawlı sekciya hám kurslar ashıw, jergilikli hám respublikalıq dárejede jarıslardı jolǵa qoyıw sıyaqlı máseleler tiykarǵı baǵdar sıpatında atap ótildi.

ÓzA