«Ózximiyasanaat» akcionerlik jámiyeti málimleme xızmetine bola, 2025-jıldıń yanvar-iyun ayları dawamında Ózbekstan ximiya sanaatı kárxanaları tárepinen 9,4 trillion sumlıq ónim islep shıǵarılǵan.

Bul kórsetkish tek ǵana mámleketlik agrosanaat kompleksiniń mútájliklerin qanaatlandırıwda emes, al eksport potencialın jáne de keńeytiwde de áhmiyetke iye.
Jıldıń birinshi yarım jıllıǵında ulıwma 307,4 million dollarlıq ximiyalıq ónimler eksport etildi. Bul rejege salıstırǵanda 111,3 procent orınlanıwın, ósiw páti bolsa 135,6 procentti quradı.
Ónimler 55 mámleketke eksport etildi. Sonıń ishinde, 167,6 million dollarlıq mineral tóginler hám 139,7 million dollarlıq ximiyalıq ónimler jetkerip berilgen bolıp, usı túrdegi ónimler ulıwma eksporttaǵı eń iri úleske iye boldı.
Sonday-aq, eksport georgafiyası da keńeyip barmaqta. Dástúriy qońsı mámleketler menen bir qatarda, Evropa mámleketlerine 63,2 million dollarlıq ónim jetkerip berildi. Sonday-aq, jańa bazarlar sıpatında Qubla Amerika (Braziliya, Peru, CHili), Qubla-Shıǵıs Aziya, Túrkiya, Hindstan hám Iran sıyaqlı mámleketler menen de birge islesiw jedellespekte.
Bul ózgerisler Ózbekstan ximiya sanaatı tarmaǵınıń xalıqaralıq bazardaǵı básekige shıdamlılıǵı jáne de bekkemlenip atırǵanınan dárek beredi.

N.Ziyodullaeva, ÓzA