OpenAI kompaniyası ChatGPTʼ xızmetinde paydalanıwshılardıń oqıw procesin jaqsılawǵa qaratılǵan jańa funkciyanı – “Oqıw rejimi” (Study Mode)n usındı. Bul rejim, ásirese, bilimlerdi tereńirek túsiniw hám bekkemlew tileginde bolǵanlar ushın mólsherlengen. Endi ChatGPTʼ tek juwap beretuǵın jasalma intellekt emes, al sanlı repetitor sıpatında da xızmet etpekte.

“Oqıw rejimi” nelerdi usınıs etedi?
Jańa funkciya paydalanıwshılarǵa tayar juwaptı usınǵannan góre, temanı basqıshpa-basqısh tallaw, sorawlar ústinde erkin pikirlew hám sheshim tabıwǵa baǵdarlaw imkaniyatın beredi. Bul arqalı paydalanıwshı óz bilimlerin tereńlestiredi hám temanı jaqsıraq ózlestiredi.
Rejim iske túskende, ChatGPTʼ paydalanıwshıdan qaysı usılda úyreniwdi abzal kóriwi (máselen, vizual túsinikler, ámeliy tapsırmalar, soraw-juwaplar arqalı) házirgi bilim dárejesi hám maqsetlerin anıqlastırıwdı soraydı.
Usı tiykarda, jasalma intellekt beyimlesiwsheń tárizde úyretiwdi baslaydı. Paydalanıwshınıń úyreniw usılı hám maqsetlerine sáykes keletuǵın usınıslar, sorawlar yamasa tapsırmalardı usınıs etedi.
“Oqıw rejimi” barlıq ChatGPTʼ paydalanıwshıları ushın bar – biypul versiya, Plus, Pro hám Team tariflerinde. ChatGPTʼ Edu oqıw versiyasına bolsa bul funkciya jaqın háptelerde qosıladı.
OpenAI wákilleriniń atap ótiwinshe, bul funkciya oqıwshılarǵa: úy tapsırmaların orınlawda, imtixanlarǵa tayarlıq kóriwde hám jańa temalardı úyreniwde sezilerli járdem beredi.
Rejim bilimlendiriw tarawı qánigeleri menen birgelikte islep shıǵılǵan bolıp, bul ChatGPTʼti rawajlanǵan oqıw járdemshisine aylandırıw jolındaǵı birinshi basqısh esaplanadı. ChatGPTʼ hám oǵan uqsas texnologiyalardıń engiziliwi óz tásirin kórsetpekte. Sonıń ishinde, ChatGPTʼ iske qosılǵannan soń, Ullı Britaniyada pitkeriwshiler hám ámeliyatshılar ushın bar bolǵan bos jumıs orınlarınıń sanı 31,9 procentke qısqarǵanı haqqında xabar berilgen.
Bul jasalma intellekttiń bilimlendiriw hám bántlik tarawlarına qanshelli kúshli tásir kórsetip atırǵanın kórsetedi.

Madinabonu NASRIEVA,
Anvarxwja AHMEDOV,
ÓzAnıń xabarshıları