Oliy Majlis Nızamshılıq palatasınıń májilisinde balalardı sociallıq qorǵaw sistemasın jaqsılawǵa qaratılǵan nızam joybarı birinshi oqıwda dodalandı.

Atap ótilgenindey, bul nızam joybarı menen jetim hám ata-ana qaramaǵınan ayırılǵan balalardı anıqlaw, dizimge alıw hám olardı múnásip tárizde jaylastırıw wákilligi Sociallıq qorǵaw milliy agentligine júklenbekte.
Balaǵa tárbiya, bilimlendiriw hám medicinalıq xızmet kórsetiw boyınsha juwapker shaxs óz wazıypasın orınlamasa, hákimshilik juwapkershilik belgilenbekte. Sonday-aq, qayırqom yamasa qáwender tayınlaw wákilligin hákimnen “Insan” sociallıq xızmetler oraylarınıń direktorlarına ótkeriw názerde tutılmaqta.
Joybarda notariuslarǵa balanı perzentlikke alıw, balanı qáwenderlikke beriw haqqındaǵı arzadaǵı qoldıń haqıyqıylıǵın tastıyıqlaw boyınsha múrájat etilgeni haqqındaǵı maǵlıwmatlardı “Insan” sociallıq xızmetler oraylarına usınıp barıw minnetlemesin júklew belgilenbekte.
Sonıń menen birge, ózine júklengen minnetlemeni zárúr dárejede orınlamaǵanı ushın qáwenderlik, qayırqomlıq yamasa tutınǵan ata-analıq wazıypaların orınlawdan shetletilgen shaxslarǵa balalar perzentlikke berilmewi hám olar qáwender yamasa qayırqom etip tayınlanbawı názerde tutılmaqta.
Pedagoglar jas óspirimlerge tálim-tárbiya beriw baǵdarındaǵı minnetlemelerin orınlamaǵanı ushın bir jıl dawamında qayta hákimshilik juwapkershilikke tartılǵan jaǵdayda olardıń bilimlendiriw shólkemlerinde pedagogikalıq jumıs penen shuǵıllanıwı qadaǵan etilmekte.
Atap ótilgenindey, nızam joybarınıń qabıl etiliwi balalardıń huqıqları menen nızamlı máplerin qorǵaw, olardıń huqıqların kepillikli qorǵawdı támiyinlewge xızmet etedi. Dodalawlardan soń nızam joybarı birinshi oqıwda qabıl etildi.

Muhtarama Komilova, ÓzA