Ózbekstan Respublikası Prezidenti Shavkat Mirziyoev 5-avgust kúni Oraylıq Aziya mámleketleri basshılarınıń jetinshi Másláhát ushırasıwına tayarlıq kóriw hám onı ótkeriw máselelerine baǵıshlanǵan arnawlı ilajda qatnastı.

Ilajda Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov, Qazaqstan Respublikası Prezidenti Qasım-Jomart Toqaev, Tájikstan Respublikası Prezidenti Emomali Rahmon, Qırǵız Respublikası Ministrler Kabineti Baslıǵı – Prezident Administraciyası baslıǵı Adilbek Qasımaliev, Ázerbayjan Respublikası Bas ministri Ali Asadov, sonday-aq, rásmiy delegaciyalar aǵzaları hám jámiyetshilik wákilleri qatnastı.
Kún tártibine muwapıq, Tashkent qalasında bolajaq Oraylıq Aziya mámleketleri basshılarınıń gezektegi Másláhát ushırasıwına tayarlıqtıń tiykarǵı tárepleri kórip shıǵıldı.
Mámleketimiz basshısı Ózbekstannıń usı formattaǵı basshılıǵı sheńberinde birgelikte ámelge asırılıp atırǵan jumıslar haqqında maǵlıwmat berdi. Atap aytqanda, jıl basında Basshılıq koncepciyası hám Birgelikte ilajlar rejesi qabıl etildi.
Qáwipsizlik keńesleriniń xatkerleri, arnawlı xızmetler basshıları, sanaat, energetika, suw xojalıǵı hám ekologiya ministrleriniń ushırasıwları, media hám jaslar forumları ótkerildi.
Jıl juwmaǵına shekem parlamentleraralıq forum, qorǵanıw, sawda hám transport ministrleriniń ushırasıwları, mádeniy-gumanitar ilajlar ótkeriliwi rejelestirilgen.
Regionallıq sherikliktiń jańa kún tártibin qáliplestiriw hám onıń nogrmativlik-huqıqıy tiykarların bekkemlew maqsetinde ushırasıwdıń konceptual hújjetleri tayarlanbaqta.
Tashkent sammiti sheńberinde Ózbekstan tárepi siyasiy sóylesiwdi tereńlestiriw, ekonomikalıq kooperaciyanıń jańa drayverlerin iske qosıw, shegaraaldı sawdanı kóbeytiw boyınsha bir qatar baslamaların alǵa qoyıw niyetinde ekeni atap ótildi. Suw hám energetika tarawlarında, transport jaǵınan óz-ara baylanıslılıqtı keńeytiw hám klimat ózgeriwi boyınsha ámeliy birge islesiw máseleleri dıqqat orayında boladı.
Ázerbayjan tárepiniń ushırasıwlarda qatnasıp atırǵanı qanaatlanıwshılıq penen atap ótildi. Búgingi kúnde region mámleketleri Ázerbayjan menen nátiyjeli birge islespekte. Sawda, transport, «jasıl» energetika tarawlarında birgeliktegi joybarlar ámelge asırılmaqta.
Ózbekstan Prezidenti sóziniń juwmaǵında Oraylıq Aziya mámleketleriniń óz-ara muwapıqlastırılǵan hám kelisilgen processlerdi regionda rawajlanıw hám abadanlıq maqsetlerine erisiwge xızmet etetuǵınına isenim bildirdi.

Qaraqalpaqstan xabar agentligi