Túrkmenstannıń Avaza qalasında BMShtıń teńizge shıǵıw imkaniyatı joq rawajlanıp atırǵan mámleketler boyınsha úshinshi konferenciyası sheńberinde “Jónelisti belgilep: teńizge shıǵıw imkaniyatı joq rawajlanıp atırǵan mámleketler ushın Avaza háreketler baǵdarlamasın ámelge asırıwǵa járdemlesiw” atamasındaǵı parlament forumı shólkemlestirildi.
Forumda Oliy Majlis Senatınıń Baslıǵı Tanzila Norboeva basshılıǵındaǵı Ózbekstan delegaciyası qatnastı.
Senat Baslıǵı óziniń shıǵıp sóylegen sózinde Ózbekstan tárepinen teńizge shıǵıw imkaniyatı joqlıǵı sebepli júzege kelip atırǵan ekonomikalıq hám logistika sheklewleri, sonıń ishinde, sırtqı sawdanıń qıyınlasıwı, transport infrastrukturasın rawajlandırıwdaǵı mashqalalardı ayrıqsha atap ótti. Ózbekstan dúnyada okeanǵa shıǵıw ushın keminde eki mámleket aymaǵınan ótiwi zárúr bolǵan eki mámleketten biri ekenin atap ótti.
Forum qatnasıwshılarınıń itibarına Ózbekstannıń regionallıq baylanıslılıq hám integraciyanı kúsheytiwge qaratılǵan baslamaları, sonıń ishinde, Temir jol hám avtomobil transportı tarawında Qazaqstan, Qırǵızstan, Túrkmenstan, Tájikstan, Qıtay sıyaqlı mámleketler menen birgelikte ámelge asırılıp atırǵan iri joybarlar tanıstırıldı.
Transawǵan koridorı – “Termiz – Mozori-Sharif – Qabul – Peshavar” temir jol magistralı perspektivadaǵı eń áhmiyetli joybarlardan biri sıpatında atap ótildi. Bul koridor Oraylıq hám Qubla Aziya arasında sawda hám logistika baylanısların keskin rawajlandırıw imkaniyatın beredi.
Forum dawamında Ózbekstan delegaciyası tárepinen bir qatar áhmiyetli baslamalar alǵa qoyıldı. Atap aytqanda, teńizge shıǵıw imkaniyatı bolmaǵan mámleketlerdiń parlamentleri arasında sistemalı sóylesiwdi jolǵa qoyıw, “jasıl” logistika hám zamanagóy infrastrukturanı rawajlandırıw, sawda hám tranzit processlerin ápiwayılastırıw jáne sanlı sheshimlerdi engiziw boyınsha parlamentleraralıq birge islesiwdi tereńlestiriw usınıs etildi.
Bunnan tısqarı, ilimiy hám texnologiyalıq birge islesiw, innovaciyalıq sheshimler almasıwı hám ilimiy forumlar shólkemlestiriw zárúrligi de atap ótildi.
***
Ilaj sheńberinde Ózbekstan Senatınıń Baslıǵı Tanzila Norboeva Ázerbayjan Milliy Mejlisi Baslıǵı Sahiba Gafarova hám Túrkmenstan Mejlisi Baslıǵı Dunyogózal Gulmanova menen ushırasıw ótkerdi.
Qızǵın ruwxta bolıp ótken sóylesiwde parlamentleraralıq birge islesiwdi bunnan bılay da rawajlandırıw, kóp tárepleme baylanıslardı keńeytiw máseleleri dodalandı.
Xiywa qalasında ótkerilgen Birinshi Ózbekstan – Ázerbayjan parlamentleraralıq forumı eki mámleket arasındaǵı doslıq qatnasıqların bekkemlewde nátiyjeli tájiriybe almasıw maydanına aylanǵanı atap ótildi.
Ózbekstan – Túrkmenstan parlamentleraralıq birge islesiw toparlarınıń jumısı izbe-iz hám nátiyjeli dawam etip atırǵanı atap ótildi. Ushırasıwda bul baǵdardaǵı jumıslardı bunnan bılay da kúsheytiw, sonıń ishinde, parlamentleraralıq komissiya sheńberinde jergilikli hákimiyat wákilleriniń qatnasıwı arqalı baylanıslardı keńeytiw áhmiyetli ekenligi atap ótildi.

N.Abduraimova,
ÓzA