Qaraqalpaqstan Respublikası sudında gezektegi Prezidium májilisi sheńberinde áhmiyetli hám saltanatlı ilaj – birinshi márte sudyalıq lawazımına tayınlanǵan jańa sudyalardıń ant qabıl etiw máresimi bolıp ótti.

Bul ilaj tek ǵana sud-huqıq sistemasındaǵı áhmiyetli waqıya emes, al mámleketimizde sud erkinligin támiyinlew, ádillikti ornatıw hám puqaralardıń huqıqların isenimli qorǵaw jolındaǵı jáne bir ámeliy qádem bolıp esaplanadı.
Qaraqalpaqstan Respublikası Joqarǵı Keńesi Prezidiumınıń 2025-jıl 28-iyul kúngi qararına tiykarlanıp, birinshi bes jıllıq múddetke sudyalıq lawazımına tayınlanǵan Qaraqalpaqstan Respublikası Jınayat isleri boyınsha Tórtkúl rayonlıq sudınıń tergew sudyası B.Saburov, Jınayat isleri boyınsha Nókis qalalıq sudınıń sudyası A.Shınıbekov, Puqaralıq isleri boyınsha Nókis rayonlararalıq sudınıń sudyası B.Opaeva, Puqaralıq isleri boyınsha Beruniy rayonlararalıq sudınıń sudyası A.Aldamuratovalar qatnastı.
Ant etiw máresiminde Qaraqalpaqstan Respublikası sudınıń baslıǵı K.Tarixov shıǵıp sóylep, jańa sudyalardı qutlıqladı hám olarǵa úlken isenim bildirip, juwapkershilikli, sonıń menen birge maqtanıshlı sudyalıq jumısında tabıslar tiledi. Ol óziniń shıǵıp sóylegen sózinde sudya kásibi tek ǵana yuridikalıq bilimler emes, al joqarı adamgershilik pazıyletler, ádillik, qalıslıq hám nızamǵa sadıqlıq talap etiletuǵının atap ótti.
Sud uyımlarında uzaq jıllardan berli dawam etip kiyatırǵan “Ustaz-shákirt” dástúri sheńberinde jańadan tayınlanǵan sudyalarǵa tájiriybeli hám abıraylı sudyalar ustaz sıpatında biriktirildi. Bul, óz gezeginde, olardıń jańa lawazımǵa tezirek beyimlesiwinde hám kásiplik ósiwinde áhmiyetli faktor boladı.
Ilajda qatnasqan ustaz sudyalar, ata-analar shıǵıp sóylep, jańa aǵzalarǵa ózleriniń jaqsı tileklerin bildirdi. Sudyalarǵa úlken juwapkershilik júklengeni, olar shıǵaratuǵın hár bir qarardıń artında insan táǵdiri turǵanı ayrıqsha atap ótildi.
Jańa sudyalar da óz sózlerinde bildirilip atırǵan isenimdi aqlawǵa hám tek ǵana nızam tiykarında ádil qararlar qabıl etiwge wáde berip, olar bilim hám tájiriybelerin xalıq mápi jolında ayamay jumsaytuǵının málim etti.
Máresim juwmaǵında hár bir jańa sudyaǵa Ózbekstan Respublikası Konstituciyası hám “Sudyalar ádebi” kitabı saltanatlı túrde tapsırıldı. Bul rámziy sawǵalar sudyalıq wazıypasında nızam ústinligi hám kásiplik etikaǵa ámel etiwdiń tiykarǵı norması ekenin jáne bir márte eskertti.

Qaraqalpaqstan xabar agentligi