Gónergen, paydalanıw ushın jaramsız hám avariyalıq jaǵdaydaǵı turaq jaylardı qayta qurıw-renovaciyalaw arqalı qala hám máhállelerdi abadanlastırıw, infrastrukturalıq obektlerdi zamanagóylestiriw, aymaqlardı arxitekturalıq, sociallıq,
ekonomikalıq hám ekologiyalıq jaqtan jaqsılaw, eski imarat-obektlerdi jańalaw, qolaylı hám energiya nátiyjeli jaǵdayǵa keltiriw qala qurılısınıń áhmiyetli táreplerinen bolıp esaplanadı. Bul baǵdardaǵı jumıslardı ámelge asırıw ushın bolsa zárúr huqıqıy tiykarlardı bekkemlew zárúr.

Usı maqsette “Qala qurılısın renovaciyalaw haqqında”ǵı nızam joybarı islep shıǵılıp, parlamenttiń tómengi palatasındaǵı frakciyalardıń májilislerinde birinshi oqıwda kórip shıǵıldı. Atap aytqanda, Xalıq demokratiyalıq partiyası frakciyasınıń májilisinde bul joybar partiyanıń Saylawaldı baǵdarlamasınan orın alǵan wazıypalardan biri ekeni ayrıqsha atap ótildi.
Baslamashılardıń málim etiwinshe, bul nızam joybarınıń maqseti qala qurılısı hújjetlerine muwapıq islep shıǵılǵan aymaqtı arxitekturalıq, sociallıq, ekonomikalıq hám ekologiyalıq jaqtan jaqsılaw sıyaqlı qala qurılısı renovaciyası tarawındaǵı qatnasıqlardı tártipke salıwdan ibarat. Sonnan kelip shıǵıp, nızam joybarı menen renovaciyanıń májbúriy shártleri, tiykarǵı principleri, renovaciya basqıshları, bul baǵdardaǵı joybarlardı islep shıǵıw hám ámelge asırıw tártibi, tarawda mámleketlik basqarıw tiykarları belgilenbekte.
Atap ótilgenindey, paydalanıwǵa jaramsız halǵa kelgen, gónergen kóp qabatlı turaq jaylardıń ornına jańaların qurıw arqalı aymaqlar abat boladı, kórkemlesedi. Biraq renovaciya baǵdarlamasınıń joybarı renovaciyaǵa túsetuǵın turaq jay múlk iyeleriniń kelisimine tiykarlanıwı hám keń jámiyetshiliktiń dodalawlarınan ótkeriliwi, sonday-aq, turaq jayı renovaciyaǵa túsken puqaralardı jańa úy qurılǵansha turaq jay menen támiyinlew yamasa ijarada tursa, ijara qárejetlerin qaplap beriw zárúr boladı.
Xalıq wákilleriniń bul baǵdardaǵı sorawlarına juwapkerler nızam joybarı menen turaq jayı renovaciyaǵa túsken múlk iyelerine bir qatar kepillikler beriletuǵının, turaq jay hám turaq jay emes múlk iyelerine ádil kompensaciya beriw sisteması názerde tutılıp atırǵanın málim etti.
Yaǵnıy, puqaralar jasap atırǵan kóp kvartiralı turaq jay renovaciyaǵa túskende, qurılısshı eki jıl múddet ishinde jańa jaydı qurıwı, sol jaydan puqaralarǵa eski jayınıń kóleminen kem bolmaǵan hám tayar ońlanǵan kvartiranı tómengi qabattan beriw minnetlemesin aladı. Bunnan tısqarı, qurılısshı jańa jay qurılǵansha ijarada jasap atırǵan xalıq wákilleriniń ijara pulın da qaplap beredi. Yamasa turaq jay hám turaq jay emes obektlerdiń bazar bahasında pul qarjıları beriliwi belgilenbekte.
Renovaciya qurılıs múddeti 2 jıl etip belgilenbekte. Eger qurılısshı 2 jılda qurıp úlgermese, keshikken hár bir kún ushın múlk iyelerine múlk bahasınıń 0,5 procenti muǵdarında penya tólewi óz kórinisin tappaqta.

Muhtarama Komilova, ÓzA