Jámiyette járdemge mútáj xalıq qatlamların qollap-quwatlaw, olardıń turmıs sapasın jaqsılaw hám sociallıq qorǵawdı támiyinlew baǵdarında elimizde izbe-iz jumıslar ámelge asırılmaqta.

Ásirese, “Kámbaǵallıqtan abadanlıqqa qaray” baǵdarlaması sheńberinde ámelge asırılıp atırǵan ilajlar nátiyjesinde sociallıq xızmetlerdiń qamtıp alıw hám túrleri keńeyip, jeke menshik sektordıń qatnasın jedellestiriwge de ayrıqsha itibar qaratılmaqta.
Ózbekstan Respublikası Prezidentiniń “Basqalardıń kútimine mútáj shaxslarǵa sociallıq xızmetler kórsetiw kólemin keńeytiw ilajları haqqında”ǵı 171-sanlı qararına muwapıq, Beruniy rayonında jáne bir ámeliy qádem taslandı. Paxtakor máhállesinde “Asadali” JShJ tárepinen kúndizgi tárbiya xızmeti shólkemlestirildi. Bul arqalı basqalardıń kútimine mútáj, er jetken shaxslarǵa xızmet kórsetiwdegi qamtıp alıw hám imkaniyatlar keńeydi, – dep maǵlıwmat beredi rayon hákimligi Málimleme xızmeti bólimi.
Jańa xızmet jolǵa qoyılıwı nátiyjesinde kútimge mútáj puqaralarǵa zárúr járdem kórsetiw menen birge, olardıń shańaraq aǵzalarına da miynet penen shuǵıllanıw imkaniyatın jaratıw názerde tutılǵan.
Joybar iske túsiriliwi múnásibeti menen rayon hákiminiń orınbasarı D.Karimov, juwapkerler hám máhálle nuranıyları jaratılǵan sharayatlar menen tanıstı. Sapar dawamında olar tárepinen bul baslama joqarı bahalanıp, bunday iygilikli jumıslardı ámelge asırıp atırǵanlarǵa jaqsı tilekler bildirildi.

Qaraqalpaqstan xabar agentligi