Jaslardıń bántligin támiyinlew, olardıń bos waqtın mazmunlı shólkemlestiriw hám kásipke baǵdarlaw búgingi kúnniń áhmiyetli máselelerinen biri bolıp esaplanadı.

Usı maqsette Berdaq atındaǵı Qaraqalpaq mámleketlik universiteti Dene mádeniyatı fakulteti hám Qanlıkól rayonı hákimligi menen birgelikte pitkeriwshi jaslar ushın “Áhmiyetli 90 kún” hám “Keleshekke qádem” baǵdarlamaları sheńberinde miynet yarmarkası shólkemlestirildi, – dep maǵlıwmat beredi QMU Baspasóz xızmeti.
Ilaj sheńberinde shólkemlestirilgen “Karera kúni” jumıssız jaslar ushın jumısqa ornalasıwda úlken imkaniyatlar esigin ashtı. Jaslarǵa óz qánigelikleri boyınsha jumıs beriwshiler menen tikkeley sóylesiw, kerekli másláhátler alıw, sonday-aq, jumısqa jaylasıw ushın kerekli maǵlıwmatlar menen tanısıw imkaniyatı jaratıldı. Bul yarmarkada pitkeriwshi jaslar menen bir qatarda jumıs beriwshi shólkemler de belsene qatnastı. Olar ózlerindegi bos jumıs orınların usınıs etip, talabanlar menen sáwbetler ótkerdi.
Shólkemlestirilgen bunday ámeliy ilajlar jaslarımızdıń sociallıq belsendiligin arttırıw, olardı jumıs penen támiyinlewge xızmet etip atırǵanı menen áhmiyetli bolıp esaplanadı. Usı arqalı pitkeriwshiler miynet bazarında óz ornın tabıwına tiykar jaratıladı.

Qaraqalpaqstan xabar agentligi