Microsoft keń kólemli izertlew nátiyjelerin járiyaladı: onda generativ jasalma intellekt (JI)tiń miynet bazarına tásiri úyrenilgen.

Paydalanıwshılar hám Microsoft Copilot arasındaǵı 200 mıńnan aslam anonim dialoglar tiykarında, izertlewshiler qollanılıwshılıq indeksi – JI-metrikasın qáliplestirdi. Ol jasalma intellekt jumısshı wazıypalarda qanshelli jedel paydalanılıp atırǵanı, onıń nátiyjeliligi jáne kásipler baǵdarındaǵı jumıstıń qansha bólegin iyelewi yamasa tolıqtırıwı múmkin ekenligin sáwlelendiredi.
Nátiyjelerge ótemiz: málimleme, jazıw jumısları hám kommunikaciyalar menen baylanıslı kásip iyeleri ushın jasalma intellekt (jumıssız qaldırıw kózqarasınan) eń kóp qáwip tuwdırmaqta. Eń ázzi kásipler top-40lıǵına awdarmashılar, tariyxshılar, jazıwshılar, redaktorlar, texnikalıq jazıwshılar hám data-scientists (biznes sheshimleri ushın maǵlıwmatlar menen isleytuǵınlar) kirgizilgen. Máselen, awdarmashılarda JI qollanıw indeksi 0,49 dı quradı – bul olardıń wazıypalarınıń derlik yarımın jasalma intellekt orınlap atırǵan yamasa tolıqtırıp atırǵanın ańlatadı. Bunnan tısqarı, JI tekstler jazıw, redaktorlaw, informaciyalıq ózgeshelikke iye maǵlıwmatlardı tayarlaw hám qarıydarlardıń sorawlarına juwap beriwdi jaqsı atqarmaqta.
Kerisinshe, jasalma intellekttiń en jayıwınan (házirshe) qáweterlenbese de bolatuǵın fizikalıq miynetti talap etetuǵın yamasa insannıń tikkeley qatnasıwı talap etiletuǵın kásiplerdiń dizimi dúzildi. Bular: aydawshılar, miyirbiykeler, stanok operatorları, qurılısshılar hám tazalawshılar. Olardıń kópshiliginiń jumısında jasalma intellektten paydalanıw indeksi derlik nolge teń.
Jasalma intellekttiń miynet bazarına búgingi tásiri uzaq keleshek máselesi emes, bul álle qashan baslanǵan transformaciya, joqarıda atap ótilgenindey, insannıń aqılıy jumısınıń ayırım baǵdarların iyeley baslaǵan. JI adamlardıń ornın tolıq iyeley almaydı, biraq ayırım kásipler baǵdarında qara miynetti isenim menen óz moynına almaqta. Kimde-kim beyimlesse hám jasalma intellektten paydalanıwdı úyrense – tek nátiyjelilik hám tezlik jaǵınan utadı. Jasalma sananıń imkaniyatlarına gúman menen qaraytuǵınlar bolsa jańa professional reallıqtan shette qalıwı múmkin.

Qaraqalpaqstan xabar agentligi