“Mámleketler aralıq muwapıqlastırıwshı suw xojalıǵı komissiyası” (MKVK)nıń ilimiy – málimleme orayı direktorı, Araldı Qutqarıw xalıqaralıq qorı joybarları boyınsha aymaqlıq birge islesiwshi D.Ziganshinanıń basshılıǵındaǵı delegaciya Moynaq rayonında rásmiy saparda boldı,-dep xabar bermekte Araldı qutqarıw xalıqaralıq qorı Atqarıw komiteti Nókis filialınıń baspsóz xızmeti.

Maǵlıwmat ornında atap ótetuǵın bolsaq, 1992-jılı 18-fevralda «Mámleketler aralıq muwapıqlastırıwshı suw xojalıǵı komissiyası” (MKVK) Oraylıq Aziyadaǵı bes mámleket (Qazaqstan, Qırǵızstan, Tájikstan, Túrkmenstan, Ózbekstan) tárepinen ulıwma suw resurslarınan paydalanıw, limitlerdi tastıyıqlaw hám suwǵarıw máseleleri boyınsha qararlardı qabıl etiw maqsetinde dúzilgen aymaqlıq shólkem bolıp esaplanadı.
1997-jılı Araldı Qutqarıw xalıqaralıq qorı usı shólkemniń quramına kirdi.
Sapar dawamında D.Ziganshina, Araldı Qutqarıw xalıqaralıq qorı Atqarıw komiteti Nókis filialınıń joybarları, bir qatar áhmiyetli obektler, Aralboyı aymaǵında suw resursların turaqlı basqarıw, “Aralboyı ekosistemasın tiklew”, “Suw resurslarınan turaqlı paydalanıw” baǵdarında ámelge asırılıp atırǵan joybarları menen jaqınnan tanıstı.
Ushırasıw sheńberinde – suw resursların nátiyjeli basqarıw, transshegaralıq birge islesiw, Aralboyı xalqınıń turmıs dárejesin jaqsılaw, taza ishimlik suw tarmaqları, drenaj sisteması hám suwdı únemlewshi texnologiyalar boyınsha ámelge asırılıp atırǵan jumıslar tuwralı óz-ara pikir alıstı.
– Aralboyı aymaǵında ámelge asırılıp atırǵan hár bir joybar – tek ǵana suw resursların tiklew emes, al insan salamatlıǵın, mádeniy qatnasıqlardı bekkemlew hám ekologiyalıq jaǵdaydı jaqsılawǵa xızmet etpekte. Moynaq búgin suwdı únemlewge ayrıqsha itibar qaratılıp atırǵan aymaqlardan sanaladı,- deydi D.Ziganshina.
«Mámleketler aralıq muwapıqlastırıwshı suw xojalıǵı komissiyası” (MKVK) basshısınıń respublikamızǵa rásmiy saparı, aymaqtaǵı suw hám ekologiyalıq mashqalalardı sheshiwde, xalıqaralıq birge islesiwdi bekkemlewge qaratılǵan áxmiyetli qádem bolıp sanaladı.

Qaraqalpaqstan xabar agentligi.