Prezidentimizdiń basshılıǵında 2024-jıldıń 7-noyabr kúni ótkerilgen videoselektor májilisinde 2025-jıl – suw xojalıǵında “Nasoslardıń nátiyjeliligin arttırıw jılı” bolıwı belgilengen edi. Sonlıqtan, búgingi kúnde Suw xojalıǵı ministrligi qaramaǵındaǵı nasoslardıń nátiyjeliligin arttırıwǵa qaratılǵan keń kólemli jumıslarǵa ilimpazlar da tartıldı.

Qaraqalpaqstan Respublikası Suw xojalıǵı ministrligi janındaǵı Qaraqalpaqstan nasos stanciyaları hám energetika basqarması qaramaǵında házirgi kúnde 303 dana SNPE-500/10 markalı nasoslardan paydalanıladı. Qánigelerdiń málim etiwinshe, bul nasoslar elektr energiyasınıń jumsalıwı joqarı bolıp, tolıq quwatlılıqta islegende saatına 110 kVt elektr energiyasın jumsaydı.
Qaraqalpaqstan nasos stanciyaları hám energetika basqarması usı markadaǵı nasoslardıń alternativ bolǵan zamanagóy, energiya únemlewshi “ShIMGE” markalı nasoslarǵa almastırıw ilajların ámelge asırmaqta. Jańa markadaǵı nasoslar Qıtay mámleketinde islep shıǵarılǵan bolıp, 18,5 kVt elektr quwatlıǵındaǵı elektr-dvigateller menen úskenelengen hám sekundına 277 litr suw shıǵarıwǵa mólsherlengen.
– Izertlew dawamında hár bir nasos stanciyasına ornatılǵan zamanagóy, energiya únemlewshi “ShIMGE” markalı nasoslardan shıǵarılıp atırǵan suwdıń jumsalıwı hám basqa da bir neshe kórsetkishler úyrenildi, – deydi Irrigaciya hám suw mashqalaları ilimiy-izertlew institutınıń “Nasos stanciyaları hám elektr energiyası” laboratoriyasınıń baslıǵı Jasur Narziev. – Atap aytqanda, basımlı qubırlarda suwdıń jumsalıwın ólshew AFT-2000N markalı lazerli portativ qurılması arqalı hám suw alıp keliwshi kanallardaǵı suwdıń jumsalıwları SONTEK S5 markalı dopler-profilograf járdeminde anıqlandı. “SNPE 500/10” markalı nasos agregatınıń alternativ sıpatında paydalanılıp atırǵan “ShIMGE” nasos agregatınıń nátiyjeliligin bahalaw maqsetinde izertlew nátiyjeleri salıstırıldı hám analitikalıq juwmaqlar tayarlanbaqta.
Ilaj dawamında Qanlıkól rayonındaǵı “Azamat,” Nókis rayonındaǵı “Kattagar,” Kegeyli rayonındaǵı “Kókózek,” Qaraózek rayonındaǵı “Esimózek” nasos stanciyalarında elektr energiyasın únemlew hám olarǵa suw alıp keliwshi kanallarda suw resurslarınan nátiyjeli paydalanıw boyınsha ilimiy-ámeliy izertlewler alıp barıldı.
Itibarlısı, nasoslardıń nátiyjeliligin arttırıw jumısına ilimpazlar da tartılıp, ilimiy juwmaqlar tiykarında eń nátiyjeli hám az energiya menen kóbirek suw shıǵarıp, alıs awıllarǵa shekem suw jetkeriw boyınsha barlıǵı birdey háreket etpekte,-dep málimleme beredi xs.uz saytı.

Qaraqalpaqstan xabar agentligi