Shanxay global basqarıw hám regionallıq izertlewler akademiyasında “Ózbekstan – 2030” strategiyasınıń prezentaciyası bolıp ótti.

Ilaj “Rawajlanıw strategiyası” orayı hám Ózbekstannıń Qıtaydaǵı elshixanası hám Shanxay qalasındaǵı Bas konsulxanası menen birgelikte shólkemlestirildi.
Prezentaciyada Shanxay globallıq basqarıw hám regionallıq izertlewler akademiyası, Shanxay shet tiller universiteti janındaǵı Rossiya, Shıǵıs Evropa hám Oraylıq Aziya institutı, Shanxay sociallıq ilimler akademiyası, Fudan universiteti, Xalıqaralıq mashqalalar institutı, Rossiya hám Oraylıq Aziya izertlewleri orayı, Shanxay siyasiy ilimler hám nızamshılıq universiteti jáne Shıǵıs Qıtay pedagogikalıq universiteti, Rossiya hám Evroaziya institutınıń professor-oqıtıwshıları hám ekspertleri qatnastı.
“Rawajlanıw strategiyası” orayınıń atqarıwshı direktorı Eldor Tulyakov óziniń bayanatında “Ózbekstan – 2030” strategiyasınıń tiykarǵı baǵdarları, tiykarǵı maqset hám wazıypaları haqqında aytıp ótti.
Sonıń ishinde, 2030-jılǵa shekem mámleketimizde joqarı qosımsha qunǵa iye ónim islep shıǵarıw kólemin arttırıw, sanlı ekonomikanı rawajlandırıw, sırt el investiciyaların tartıw, sociallıq tarawdı reformalaw – bilimlendiriw hám densawlıqtı saqlaw sistemasın jetilistiriw, xalıqtıń abadanlıǵın arttırıw, jaslar hám hayal-qızlar ushın teńdey imkaniyatlar jaratıw, “jasıl ekonomika,” suw resursların aqılǵa uǵras basqarıw hám qorshaǵan ortalıqtı qorǵaw máseleleri, sonday-aq, Oraylıq Aziyada turaqlılıqtı támiyinlew, transshegaralıq birge islesiw hám sırtqı siyasatta turaqlı qatnastı qáliplestiriw baǵdarında belgilengen wazıypalarǵa ayrıqsha itibar qaratıldı. Prezentaciya dawamında qatnasıwshılar tárepinen “Ózbekstan – 2030” strategiyası mámleketimizdiń tek ǵana ishki emes, al sırtqı siyasatınıń baǵdarların belgilep beretuǵın, mámleket rawajlanıwınıń hám ekonomikalıq, hám sociallıq táreplerin qamtıp alatuǵın hújjet sıpatında tán alındı, delinedi “Rawajlanıw strategiyası” orayınıń maǵlıwmatında.
Ózbekstannıń dáramatı ortashadan joqarı bolǵan mámleketler qatarına kiriw, bilimlendiriw, densawlıqtı saqlaw hám sociallıq qorǵaw sistemaların modernizaciyalaw sıyaqlı baǵdarlardaǵı háreketleri qıtaylı investorlar ushın keń imkaniyatlar esigin ashıp atırǵanı atap ótildi.
Prezentaciyadan soń “Rawajlanıw strategiyası” orayınıń atqarıwshı direktorı Eldor Tulyakov hám Shanxay globallıq basqarıw hám regionallıq izertlewler akademiyasınıń atqarıwshı dekanı professor Yan CHen arasında ushırasıw bolıp ótti.
Sóylesiw dawamında eki tárepleme baylanıslardı bekkemlew, atap aytqanda, birgeliktegi izertlewlerdi shólkemlestiriw hám mápdar tarawlarda birge islesiwdi jáne de jedellestiriw máseleleri hár tárepleme dodalandı.
Sóylesiwler juwmaǵında “Rawajlanıw strategiyası” orayı hám Shanxay globallıq basqarıw hám regionallıq izertlewler akademiyası arasında qısqa múddetlerde birge islesiw haqqındaǵı túsinisiw memorandumınıń joybarın islep shıǵıw hám qol qoyıwǵa kelisip alındı.

A.RUSTAMOV, ÓzA