Ózbekstan wákilleri 2025-jılǵı Xalıqaralıq ekonomika olimpiadasında (International Economics Olympiad, IEO) tabıslı qatnasıp, elimiz tariyxındaǵı eń joqarı nátiyjeni atap ótti.

Baku qalasında bolıp ótken bul abıraylı jarısqa 50 den aslam mámleket, sonıń ishinde, AQSh, Kanada, Rossiya, Braziliya, Ispaniya, Meksika sıyaqlı dúnyanıń jetekshi mámleketleri qatarında bes qatnasıwshıdan ibarat Ózbekstannıń eń qábiletli oqıwshıları komandası da qatnastı.
Jerleslerimizden Qarshı qalasındaǵı Prezident mektebiniń oqıwshıları Asliddin Boynazarov gúmis medalǵa iye boldı hám “Best in Finance” arnawlı sıylıǵın qolǵa kirgizdi, Humoyunbek Ibrohimov 3-orındı iyeledi, Zuhriddin Ibodovqa da arnawlı sertifikat tapsırıldı.
Tashkent qalasındaǵı Prezident mektebiniń oqıwshısı Behruz Olimov hám Ferǵana qalasındaǵı Prezident mektebiniń oqıwshısı Sardor Anvarov “Honourable mention” húrmet jarlıǵı menen sıylıqlandı.
Bul jetiskenliklerdiń tiykarında júdá kóp pidayı ustazlar, atap aytqanda, komanda sárdarı, Tashkent qalasındaǵı xalıqaralıq Vestminster universitetiniń aǵa oqıtıwshısı doktor Temur Mahkamovtıń da tınımsız miyneti jatır. Bul qánige finalshılardı tańlap alıw, shınıǵıw shólkemlestiriw, jaslarımızdı ruwxlandırıp, xalıqaralıq dárejede tayarlaw baǵdarında jankúyerlik kórsetti. Usı tárizde jetik bilim, kúshli tayarlıq arqalı Ózbekstan komandası tariyxıy nátiyjege eristi. Mahkamovtıń pikirinshe, ekonomika pánine qızıǵıwshılıqtı kúsheytip, jáne de joqarı sheklerdi qolǵa kirgiziw múmkin.
– Aymaqlardaǵı barlıq mekteplerde ekonomika pánine itibar, Olimpiadaǵa tayarlıq kúsheyse, nátiyjelerimiz jáne de joqarı boladı, – deydi doktor Temur Mahkamov. – Elimizde ziyrek, óz aldına joqarı maqsetler qoyǵan balalar oǵada kóp. Olardı durıs baǵdarlap, qollap-quwatlasaq, elimizden xalıqaralıq kólemdegi ilimpazlar jetisip shıǵıwı sózsiz. Biz zárúr oqıw materialların usınıwǵa tayarmız. Eń áhmiyetlisi, mektepler usı pándi rawajlandırıwǵa ayrıqsha itibar qaratıwı kerek.
Aytpaqshı, jámáátimiz quramındaǵı 5 qatnasıwshıdan tórtewi Qarshı qalasındaǵı Prezident mektebinde bilim aladı. Bul ilimiy dárgaydıń ekonomika páni oqıtıwshısı Wktam Xwjaqulovtıń miynetleri ayrıqsha itibarǵa ılayıq. Áyne ol oqıwshılarǵa ilham berip, olardı tereń tayarlaǵan, xalıqaralıq maydanda básekige shıdamlı dárejege jetkergen. Sonday-aq, Pán olimpiadaları orayınıń direktorı Twraboy Shermatovtıń hákimshilik qollap-quwatlawı da ayrıqsha áhmiyetke iye boldı. Oray tárepinen kórsetilgen shólkemlestiriwshilik járdem sebepli wákillerimiz Olimpiadada tolıq tayarlıq penen qatnastı.
Xalıqaralıq Ekonomika olimpiadası hár jılı 16-20 jas aralıǵındaǵı eń qábiletli oqıwshılardı birlestirip, olardıń ekonomikalıq pikirlew, finanslıq sawatlılıq hám turmıslıq ekonomikalıq mashqalalardı sheshiw boyınsha bilimin sınaqtan ótkeredi. Bul rettegi Olimpiada elimiz ushın tariyxıy áhmiyetke iye boldı: birinshi márte eki medal – gúmis hám bronza jáne qarjı boyınsha ayrıqsha itibar menen ulıwma esapta joqarı nátiyje. Bul ekonomikalıq bilimlendiriwdi rawajlandırıw, muǵallimlerdiń miyneti, milliy dárejede qollap-quwatlaw hám jetekshi qánigelerge itibardıń nátiyjesi bolıp tabıladı.

Muharrama Pirmatova, ÓzA