Avstraliya dúnyada birinshi bolıp «YouTube» sociallıq tarmaǵı jas óspirimler ushın qadaǵan etiletuǵının ayttı. Endi video almasıw platformasınan azat etiw haqqındaǵı aldınǵı qarar biykar etiledi. Bul haqqında «Arab News» xabar bergen.

Materik-mámlekettiń Internetti qadaǵalaw shólkemi ótken ayda húkimetti usı tarmaq ushın usınıs etilgen erkinlikti biykarlawǵa shaqırdı. Sebebi, bul struktura ótkergen izertlew 10-15 jas aralıǵındaǵı balalardıń 37 procenti usı tarmaqta unamsız kontent kórgenin anıqlaǵan.
«Meta» quramındaǵı basqa sociallıq media kompaniyaları «YouTube» qadaǵan etiliwi ádalatsız ekenin atap ótken.
– Sociallıq tarmaq belgili bir juwapkershilikke iye hám sózsiz, házirgi waqıtta onlayn platformalar balalardıń sanasına unamsız tásir kórsetip, jámiyetke sociallıq zıyan jetkermekte, – dedi Bas ministr Entoni Albaneze óziniń bildiriwinde. – Avstraliyalı ata-analar biziń bul máselede qatań kózqarasqa iye ekenimizdi biliwin qáler edim.
Ótken jılı noyabr ayında parlament qabıl etken nızamdı buzǵan sociallıq media strukturaları dekabr ayınan baslap 32,2 million dollarǵa shekem járiymaǵa tartılǵan.
«YouTube»tiń wákili kompaniya keyingi qádemlerdi kórip shıǵatuǵının, húkimet penen birge islesiw dawam etetuǵının bildirgen:
– Húkimettiń onlayn zıyandı saplastırıw yamasa azaytıwǵa qaratılǵan maqsetin túsinemiz. Biziń kózqarasımız da anıq: «YouTube» – biypul, joqarı sapalı maǵlıwmat toplamına iye video almasıw platforması, sociallıq media minberi emes.
Baylanıs ministri Anika Uellstiń pikirinshe, onlayn oyın hám xabar almasıw qosımshaları, densawlıqtı saqlaw, bilimlendiriw saytları 16 jasqa shekemgi jas óspirimler ushın sociallıq tarmaqlarǵa qaraǵanda az zıyan jetkeredi. Bul boyınsha tiyisli qaǵıydalar nızam menen tártipke salınadı.
– Qaǵıyda – umıtılatuǵın sózlerdiń jıyındısı emes, toplam hám súyenishi bolıp tabıladı, – degen Uells.

M.Pirmatova, ÓzA