Dúnya kritikalıq minerallar boyınsha jańa dáwirge kirdi. Ózbekstan da bul processler orayında bolıwǵa umtılmaqta.

Ótken jılı mámleketimiz Evropa Awqamı menen áhmiyetli shiyki zat tarawında birge islesiw boyınsha kelisimge qol qoyǵan edi. Endi bolsa jáne bir úlken qádem taslandı – Ózbekstan texnologiyalıq metallar kombinatı Evropa áhmiyetli shiyki zat alyansına rásmiy túrde aǵza boldı. Bul biziń global bazardaǵı ornımızdı jáne de bekkemleydi.
Evropa áhmiyetli shiyki zat alyansı Evropa sanaatınıń resurs siyasatın belgileytuǵın eń áhmiyetli platformalardan biri bolıp, ol Evropa sanaatı ushın litiy, volfram, molibden hám siyrek ushırasatuǵın jer elementlerin qáwipsiz hám turaqlı dáreklerden jetkerip beriwdi támiyinleydi. Bul alyans Evropanıń jasıl texnologiyalar hám keleshek energetikasına ótiw procesinde sheshiwshi kúshke iye.
Mámleketimizdiń de bul alyansqa qosılıwı úlken áhmiyetke iye. Yaǵnıy Evropa Awqamı menen institucionallıq qarım-qatnastı jáne de bekkemlew, ásirese, shiyki zattı tereń qayta islew, sapa standartların engiziw hám eksport imkaniyatların keńeytiwge, investiciyalıq tartımlılıqtı arttırıwǵa xızmet etedi. Mámleketimizdiń isenimli hám strategiyalıq sherik sıpatında xalıqaralıq kólemde tán alınıwına úles qosadı. Evropanıń texnologiyalıq hám ilimiy klasterleri, atap aytqanda, Germaniya, Franciya, Finlyandiya hám Avstriyada jaylasqan aldınǵı oraylar menen birgeliktegi baslamalardı ámelge asırıw arqalı birge islesiw keńeyedi.
Sonday-aq, bul aǵzalıq Ózbekstan texnologiyalıq metallar kombinatın kritikalıq minerallar bazarında pútkilley jańa dárejege alıp shıǵıwı kútilmekte. Atap aytqanda, Evropa grantları hám investiciyaları arqalı bul baǵdardaǵı joybarlar ushın finanslıq mexanizmler keńeyedi. Evropanıń aldınǵı orayları menen birgelikte izertlewler alıp barıladı hám innovaciyalar engiziledi. Kombinattıń ónimleri xalıqaralıq bazarǵa jáne de joqarı sapa kórsetkishleri menen shıǵadı.
Evropa áhmiyetli shiyki zat alyansınıń direktorı Massimo Gasparon da birge islesiwden úmiti úlken ekenin bildirdi.
Bul aǵzalıq Ózbekstandı ápiwayı shiyki zat jetkerip beriwshiden innovaciyalıq sherik dárejesine kóteredi, dep úmit etemiz.

Mohigul QOSIMOVA tayarladı, ÓzA