Usı jıl 31-iyulda qabıl etilgen ÓRN-1078-sanlı nızam menen ayırım nızam hújjetlerine qosımshalar hám ózgerisler kirgizildi.

Nızam hújjetlerine kirgizilgen qosımshalarǵa bola, satıwshılardı aldı-sattı shártnamasında kórsetilgen minnetlemelerdi óz waqtında orınlawǵa iytermeleytuǵın normalar belgilendi.
Atap aytqanda, satıwshı aldı-sattı shártnamasında kórsetilgen múddette tovardı tapsırıw boyınsha minnetlemesin orınlamaǵanda, keshiktirilgen hár bir waqıt birligi ushın minnetleme orınlanbaǵan bóleginiń 0,5 procenti muǵdarında tutınıwshıǵa penya tólewi názerde tutıldı.
Biraq onda peniyanıń ulıwma summası tapsırılmaǵan tovar bahasınan asıp ketpewi kerek.
Sonday-aq, nızam menen Hákimshilik juwapkershilik haqqındaǵı kodekske ishki isler uyımları xızmetkeri hám Milliy gvardiya áskeriy xızmetkeriniń nızamlı talapların orınlamawǵa baylanıslı huqıqbuzarlıqlar ushın jaza ilajlarınıń kúsheytiliwin názerde tutatuǵın qosımshalar hám ózgerisler kirgizildi.
Bunnan tısqarı, nızam hújjetlerine kirgizilgen ózgerislerge bola, barlıq azıq-awqat ónimlerin islep shıǵarıwda tek ǵana yodlanǵan duzdan paydalanılıwı belgilendi,- dep málimleme beredi xabar.uz saytı.

Qaraqalpaqstan xabar agentligi