Ózbekstan Respublikası Prezidenti, Qurallı Kúshler Joqarǵı Bas Sárkardası Shavkat Mirziyoev áskeriy bilimlendiriw sistemasın jetilistiriwge baylanıslı usınıslardıń prezentaciyası menen tanıstı.

Bul haqqında usı jıl 21-fevral kúni bolıp ótken Qáwipsizlik keńesiniń májilisinde tapsırma berilgen edi. Soǵan muwapıq, 20 dan aslam sırt mámlekettiń tarawǵa baylanıslı aldınǵı tájiriybeleri úyrenilip, áskeriy bilimlendiriwdi reformalaw boyınsha jańa milliy model islep shıǵıldı.

Usınısqa bola, Qurallı Kúshler akademiyası reformalanıp, onıń negizinde Ózbekstan Respublikası áskeriy qáwipsizlik hám qorǵanıw universiteti shólkemlestiriliwi názerde tutılmaqta. Qorǵanıw ministrliginiń barlıq áskeriy bilimlendiriw mákemeleri – 5 institut, Serjantlar tayarlaw joqarı mektebi hám Aviaciya hám ushıwshısız ushıw apparatları qánigelerin tayarlaw orayı institut statusında usı universitettiń quramına ótkeriledi. Bul oraylasqan vertikal sistemanı payda etip, áskerlerdiń jawıngerlik potencialın arttırıw, dual bilimlendiriwdi keńeytiw, ilimiy izertlewlerdi ámeliyatqa engiziwge xızmet etedi.

Máselen, Serjantlar tayarlaw joqarı mektebinde armiyanıń tiykarǵı tayanıshı bolǵan serjantlardı oqıtıw, olarda jetekshilik qábiletin qáliplestiriw, zamanagóy qurallar hám jańa taktikalıq usıllar boyınsha kónlikpelerin arttırıwdıń jańa sisteması engiziledi.

Jańalıqlardan jáne biri – tar sheńberdegi qánigelikler boyınsha “2+2” tártibi jolǵa qoyılatuǵını bolıp esaplanadı. Yaǵnıy, psixolog, baylanısshı, támiynatshı, qoymaxanashı sıyaqlı 18 túrli taraw qánigeleri basqa joqarı bilimlendiriw mákemeleriniń 2-basqısh studentleri arasınan tańlap alınadı.

Qábiletli jaslardı qollap-quwatlaw maqsetinde, jańa oqıw jılınan baslap, pitkeriwshi basqısh kursantları ushın tańlaw tiykarında “Joqarı Bas Sárkarda” mámleketlik stipendiyası engiziledi. Bul stipendiya iyesi bakalavriattı tamamlaǵannan soń 5 jıl dawamında joqarı áskeriy bilimlendiriw mákemeleriniń magistraturasına imtixanlarsız qabıl etiledi.

Jáne bir itibarlı tárepi, endigiden bılay joqarı áskeriy bilimlendiriw mákemeleriniń 36 bilimlendiriw baǵdarınıń pitkeriwshileri bir waqıttıń ózinde eki diplom – puqaralıq hám áskeriy kásipke mólsherlengen qánigelik iyesi boladı. Bul olarǵa áskeriy xızmetten keyin de belsene islew imkaniyatın beredi.

Bul reformalarǵa sáykes áskeriy pedagoglardı tańlap alıwǵa da talap kúsheyedi. Sonıń ishinde, áskeriy pedagoglardı jetekshi sırt mámleketlerde oqıtıw sisteması jolǵa qoyıladı.

Prezentaciyada bul usınıslar maqullandı hám olardı ámeliyatqa nátiyjeli engiziw boyınsha kórsetpeler berildi.

ÓzA