Mámleketimiz basshısına 28-iyul kúni Ándijan wálayatında reformalardıń nátiyjeliligi hám jańa rejeler boyınsha málimleme berildi.

Ózbekstan Prezidentiniń 2024-jıl 18-noyabrdegi qararı menen Ándijan wálayatın sociallıq-ekonomikalıq rawajlandırıw jáne investiciya hám isbilermenlik ortalıǵın bunnan bılay da jaqsılaw ilajları belgilengen edi. Sonıń ishinde, usı jılı 3,1 milliard dollar investiciya alıp keliw, 1,5 milliard dollar eksport etiw, 305 mıń adamnıń bántligin támiyinlew, 32 mıńnan aslam shańaraqtı kámbaǵallıqtan shıǵarıw názerde tutılǵan.

Wálayatta jıl basınan berli 1 milliard dollarlıq jańa quwatlıqlar, 344 sawda hám servis kompleksi iske qosılǵan. Jáne 2,5 milliard dollarlıq joybarlar baslanǵan. Ótken 6 ayda 850 million dollar investiciya tartılıp, eksport 465 million dollardı quraǵan.

Mámleketimiz basshısınıń usı jıl aprelde wálayatqa saparı hám onda belgilengen wazıypalar aymaqtıń rawajlanıwına qosımsha túrtki boldı. Jaqında ilimiy ekspertler, belsendi isbilermenlerdiń qatnasıwında “Reformalar shtabı” dúzildi. Olar tárepinen ekonomikalıq-sociallıq tarawlarǵa baylanıslı jańa usınıslar islep shıǵılǵan.

Prezentaciyada juwapkerler olardıń tiykarları hám nátiyjeliligi boyınsha málimleme berdi.

Máselen, 40 million dollar investiciya esabınan Germaniya, Túrkiya hám Yaponiyadan robot-texnologiya alıp kelip, innovaciyalıq klinika qurıw rejelestirilgen. Yamasa, elshilerdiń járdeminde agroklaster shólkemlestiriwge Italiyadan 20 million evro, zamanagóy agrologistika kompleksin qurıwǵa Germaniyadan 25 million evro tartılıwı mólsherlengen. Xanabad qalası, Xojaabad hám Bulaqbashıda turistlik orınlar shólkemlestiriw boyınsha 30 dan aslam baslamalar bildirilgen.

Ulıwma aytqanda, 1 milliard 100 million dollarlıq qosımsha joybarlar qáliplestirilgen. Olardıń nátiyjesinde 22 mıń jumıs ornı, qosımsha 200 million dollarlıq eksport imkaniyatı ashıladı.

Mámleketimiz basshısı wálayattaǵı hár bir qala hám rayonǵa ayrıqsha qatnas jasap, jańasha islew, jańa joybarlardı investiciyası az aymaqlarǵa jaylastırıw zárúrligin atap ótti. Jumıssız hám járdemge mútáj shańaraqlardı oqıtıp, jumısqa jaylastırıw, máhállelerdi jınayatshılıqtan jıraq aymaqqa aylandırıw boyınsha kórsetpeler berildi.

ÓzA