Endi hár qanday normativlik-huqıqıy hújjet hám joybar Prezident Administraciyası janındaǵı ilimiy-tallaw institutlarınıń izertlewleri, ilimpazlar, jergilikli hám sırt el ekspertleriniń usınısları tiykarında islep shıǵıladı.

Bul Ózbekstan Respublikası Prezidenti Shavkat Mirziyoev tárepinen qol qoyılǵan “Mámleketlik basqarıw sistemasında effektivlilik, proaktivlik hám nátiyjelilikti arttırıw ilajları haqqında”ǵı pármanda keltirilgen. Áhmiyetli baǵdarlar joybarlaw ofisleri arqalı ámelge asırıladı. Administraciya jumısında “komplaens” sisteması jolǵa qoyıladı. Bul bolsa ashıq-aydınlıqtı támiyinlew, orınlaw tártibin bekkemlew hám korrupciya jaǵdaylarınıń aldın alıwǵa xızmet etedi.

Ayırım baǵdarlarda Prezident wákilleri lawazımları engizildi. Sonday-aq, Málimleme hám ǵalaba kommunikaciyalar agentligi (MǴKA) jumısı saplastırılıp, onıń tiykarında Milliy kontent islep shıǵarıwshı oray shólkemlestirilmekte.

Mámleketlik uyımlardıń jámiyetshilik aldındaǵı esap beriwi arttırılmaqta. Baspasóz xatkerleri institutı jáne de bekkemlenedi, xalıq penen baylanıs hám ǵalaba xabar quralları menen islesiwdiń jańa sisteması engizilmekte.

ÓzA