Prezident Shavkat Mirziyoev Tashkent qalasındaǵı qurılıs jumısları, xalıqtıń turmıs sharayatları, sanaat kárxanalarınıń jumısı menen tanıspaqta.

Bul retki baǵdar Shayxantohur hám CHilanzar rayonların qamtıp aldı. Olardı Bunyodkor kóshesi baylanıstırıp turadı. Bul oraylıq kóshede kórkem óner hám mádeniyat orayları, hár qıylı ofisler, kóp qabatlı turaq jaylar, supermarket hám restoranlar jaylasqan. Bul potencialdan paydalanıp, onıń 1,5 kilometr bólegi xızmet kórsetiw hám gastroturizm kóshesine aylandırıldı.

Mámleketimiz basshısı jámiyetshilik wákilleri menen birge bul jerdegi sharayatlardı kózden ótkerdi.

Jol boyı abadanlastırılǵan. Ájayıp landshaft dizaynı, fantanlar, hár qıylı shıraqlar aymaqqa jáne de kórik baǵıshlaǵan. Adamlardıń seyil etiwi, awqatlanıwı, mazmunlı dem alıwı ushın barlıq qolaylıqlar jaratılǵan.

Usı maqsette bul jerdegi 90 isbilermenlik subekti kúni-túni jumıs islew tártibine ótkerildi. Sonnan 45 kárxana jańadan shólkemlestirildi. 500 adam jumıs penen támiyinlendi.

Kóshege tutas aymaqtaǵı Kamolon, Jańa Kamolon hám Kamolon dárwaza máhállelerinde 18 mıńǵa shamalas xalıq jasaydı. Bul ózgerisler, bárinen burın, usı insanlardıń turmısında seziledi. Qalaberse, házir bul jerge jılına 255 mıń miyman kelmekte. Endi olardıń sanın jılına 1 millionǵa jetkeriw ushın sharayat bar.

Sońǵı jılları elimizde turizm tarawında 2 mıńnan aslam jańa isbilermen jumıs basladı. Ótken jılı sırt elli turistlerdiń keliwi birinshi márte 10 millionnan astı. Aymaqlarda sayaxat hám servis infrastrukturası jaqsı rawajlanbaqta. Turizm awılları, miyman úyleri, gastronomiyalıq kósheler qollap-quwatlanbaqta.

Paytaxtımızdıń Mirabad, Almazar, CHilanzar, Yakkasaray, Yangihayot rayonlarında usınday háreketi kóp kósheler shólkemlestirilgen. Bunyodkor kóshesi usı turizm aylanbasınıń bir bólegi boladı. Ulıwma, Tashkent qalasında 26 kósheni kúni-túni isleytuǵın háreketli kóshege aylandırıw, 24 saat isleytuǵın sawda shaqapshaların mıńǵa kóbeytiw rejelestirilgen.

Bul jerde zamanagóy bándirgiler hám avtomobil turatuǵın orınlardıń prezentaciyası bolıp ótti.

ÓzA