Tashkent fotosúwretler úyinde “Moynaq: keshe, búgin, erteń” atamasında fotokórgizbe ashıldı.

Joybar Ózbekstan Milliy málimleme agentligi, Ózbekstan Kórkem óner akademiyası, Ádillik ministrligi janındaǵı “Ózarxiv” agentligi, Ózbekstan Kinofotofono hújjetleri milliy arxivi hám Tashkent fotosúwretler úyi menen birgelikte shólkemlestirildi.

Ekspoziciya tariyxıy hám zamanagóy fotosúwretlerdi birlestirip, tamashagóyge joǵalǵan teńizden onıń burınǵı jaǵıslarında turmıstı tiklew boyınsha ámelge asırılıp atırǵan háreketlerge shekemgi joldı kóriw imkaniyatın beredi.

Arxiv fotosúwretlerinde Moynaqtıń rawajlanǵan dáwiri, balıqshılar, olardıń qayıqları, suwdıń keńligi, islep turǵan zavodlar, teńiz boyındaǵı balalıq kórinisleri sáwlelengen. Zamanagóy fotosúwretler bolsa búgingi Moynaqtı súwretleydi. Sonıń menen birge, olar Prezidentimiz Shavkat Mirziyoevtiń baslaması menen baslanǵan Aralboyın tiklew jumısları sheńberindegi anıq ózgerislerdi hújjetlestirgen. Bul reformalar ekologiyalıq, infrastrukturalıq, sociallıq hám mádeniy joybarlardı óz ishine alıp, aymaqtıń turaqlı rawajlanıwına qaratılǵanı menen áhmiyetli.

Kórgizbe Moynaqqa tek ǵana Aral teńizi qurıwınıń awır aqıbetlerinen jábir kórgen aymaq sıpatında emes, al onda álle qashan ózgerisler júz berip atırǵan, keleshekke qádem qoyǵan aymaq sıpatında qaraw imkaniyatın beredi. Onda turaqlı rawajlanıw, jańa sheshimler hám úmitler mákanına aylana baslaǵan regionǵa ózgeshe kózqaras jámlengen.

Joybar haqıyqıy reformalar, hújjetli tariyx hám Ózbekstannıń eń áhmiyetli aymaqlarınan biri bolǵan Moynaqtıń táǵdiri menen qızıqqan bársheni pikirlewge shaqıratuǵını anıq.

Kamola Yusupova,

ÓzA