Házirgi kúnde jerden únemli paydalanıw, ásirese, ǵálleden bosaǵan maydanlarda máwsimlik hám eksportqa jaramlı eginlerdi jaylastırıw mámleket awıl xojalıǵınıń tiykarǵı baǵdarlarınan biri bolıp esaplanadı. Usı maqsette Beruniy rayonındaǵı “Izzat Jumaniyazov” hám “Reyimbay baslıq” fermer xojalıqları bazasında ámeliy seminar shólkemlestirildi.

Seminarǵa Ózbekstan Fermerler Keńesiniń Awıl xojalıǵı bólimi baslıǵı M.Muhammadiev, Qaraqalpaqstan Respublikası Fermerler Keńesi qorınıń baslıǵı A.Ajimov, sonday-aq, rayonda jumıs alıp barıp atırǵan iri hám orta fermer xojalıqlarınıń basshıları qatnastı.

Ilaj dawamında ǵálleden bosaǵan jerlerge tákirarıy egin sıpatında tiykarınan másh hám palız ónimlerin egiw máseleleri dodalandı. Eksportqa qolaylı hám bazarda talap joqarı bolǵan bul eginler tek ǵana xalıqtıń tutınıwın qanaatlandırıw emes, al qosımsha dáramat dáregi sıpatında da áhmiyetke iye.

Qánigeler hám tájiriybeli fermerlerdiń qatnasıwında ótkerilgen ámeliy ilajlar waqtında jerdi agrotexnikalıq talaplar tiykarında qayta islew, tuqım tańlaw, suwǵarıw hám zúráátlilikti arttırıw boyınsha usınıslar berildi. Sonday-aq, ótkerilgen seminarda wazıypalardı óz waqtında hám sistemalı túrde shólkemlestiriw, keshigiwlerge jol qoymaw boyınsha anıq kórsetpeler hám tapsırmalar berildi.

Maǵlıwmat ushın: Beruniy rayonında bıyılǵı máwsimde jámi 3017 gektar maydanda sobıqlı, ovoщ hám palız eginlerin egiw rejelestirilgen.

Qaraqalpaqstan xabar agentligi