Berdaq atındaǵı Qaraqalpaq mámleketlik universitetine Ózbekstandaǵı Qıtay milliy mádeniy orayınıń direktorı Yan Yaoyun keldi. Sapar sheńberinde universitettiń xalıqaralıq birge islesiw boyınsha prorektorı T.Nurımbetov penen ushırasıw shólkemlestirildi. Bul ushırasıw eki tárepleme birge islesiw perspektivaların dodalaw, jańa baǵdarlar boyınsha pikir alısıw hám birge islesiwdi jáne de jedellestiriw maqsetinde ótkerildi.

Sóylesiw waqtında bilimlendiriw, mádeniyat hám til úyretiw tarawlarındaǵı birge islesiw máselelerine ayrıqsha itibar qaratıldı. Atap aytqanda, Berdaq atındaǵı Qaraqalpaq mámleketlik universiteti hám Qıtay milliy mádeniy orayı arasında tikkeley baylanıslar ornatıw, joybarlardı jolǵa qoyıw imkaniyatları dodalandı.

Ushırasıw juwmaǵında tárepler óz-ara paydalı birge islesiwdi rawajlandırıw boyınsha bir qatar kelisimlerge eristi. Ásirese, keleshekte birgeliktegi joybarlardı ámelge asırıw, qıtay tilin úyretiw kursların shólkemlestiriw, mádeniy ilajlar ótkeriw baǵdarında anıq rejeler belgilep alındı.

Bul sapar etiw eki xalıq arasındaǵı doslıq qatnasıqlar hám óz-ara túsinisiw tiykarında rawajlanıp atırǵan bilimlendiriw baǵdarındaǵı birge islesiwdiń gezektegi ámeliy nátiyjesi sıpatında bahalanbaqta.

Qaraqalpaqstan xabar agentligi