Prezident Shavkat Mirziyoev 1-iyul kúni sanlı texnologiyalar, jasalma intellekt hám telekommunikaciya tarawlarındaǵı rejeler prezentaciyası menen tanıstı.
Mámleketimizde sanlı texnologiyalar ushın jaratılǵan keń imkaniyatlar úlken nátiyjeler alıp keldi. IT-park rezidentleri 2 mıń 800 den arttı, sırt el kompaniyaları 752 ge jetti. Bul tarawda 40 mıń jaslar joqarı dáramat tappaqta.
Sońǵı 5 jılda taraw eksportı 170 million dollardan 1 milliard dollarǵa jetpekte. Internet tezligi 7 esege, mobil internet bolsa 4,5 esege arttı. Ótken jılı tarawdaǵı startaplarǵa 70 million dollar venchur investiciya kirgizildi.
Bulardıń nátiyjesinde “Global startaplar indeksi” reytinginde Ózbekstan 12 tekshe joqarılap, “TOP-100″ge kirdi. Ótken jılı “Jasalma intellektke tayarlıq” xalıqaralıq indeksinde elimiz 17 tekshe kóterilip, Oraylıq Aziyada 1-orındı iyeledi. Ózbekstan telekommunikaciya tarawınıń ósiw pátleri boyınsha ǴMDA mámleketleri reytinginde birinshi orındı iyeledi.
Bunday jumıslar izbe-iz dawam ettirilmekte. Atap aytqanda, kelesi jılı mámleketlik xızmetlerdi sanlastırıwdı 70 procentke, IT xızmetleriniń muǵdarın 100 trillion sumǵa jetkeriw rejelestirilgen. “Elektron húkimet rawajlanıw indeksi”nde keminde 55-orınǵa kóteriliw maqset etilgen. Bul kórsetkishlerge erisiw ushın bir qatar hújjet joybarları islep shıǵılǵan.
Prezentaciyada usı joybarlar hám usınıslar dodalandı.
Búgingi kúnde 760 mámleketlik xızmet sanlastırılǵan. Ótken jılı 10 million puqara sanlı xızmetlerden paydalanǵan.
Mámleketimiz basshısı endi sońǵı «Sanlı húkimet» basqıshına ótiw waqtı kelgenin atap ótti. Bunı, bárinen burın, xalıq eń kóp múrájat etetuǵın bilimlendiriw, medicina, qurılıs hám kommunal tarawlardan baslaw kerek ekenligi aytıldı.
Ózbekstan Prezidentiniń 2024-jıl 14-oktyabrdegi qararına muwapıq, Jasalma intellekt texnologiyaların 2030-jılǵa shekem rawajlandırıw strategiyası qabıl etilgen edi. Bul tarawda infrastrukturanı jaqsılawǵa 50 million dollar ajıratıldı. Jasalma intellekt milliy modelin jaratıp, 1 million qánige tayarlaw wazıypası belgilengn.
Sanlı texnologiyalar ministri bunı ámelge asırıw basqıshları, infrastrukturanı jaqsılaw ilajları haqqında málimleme berdi.
Tarawda xızmetler kólemi hám eksportın arttırıw da áhmiyetli wazıypalardan. Házirgi waqıtta bul baǵdardaǵı kórsetkishlerdiń tiykarǵı bólegi Tashkent qalasınıń úlesine tuwra kelmekte. Ózbekstandaǵı sharayatlar hám jeńillikler nátiyjesinde basqa relokantlar da elimizge keliwden máp kórip atır. Sol sebepli hár bir aymaqta tartımlı ortalıq jaratıp, sırt el kompaniyaların tartıw áhmiyetli ekenligi atap ótildi.
ÓzA