Beruniy rayonındaǵı “Bárkamal áwlad” balalar mektebinde jaslardıń bos waqtın mazmunlı shólkemlestiriwge úlken itibar qaratılmaqta. Prezidentimizdiń “Áhmiyetli 90 kún” baǵdarlaması sheńberinde mektepte hár qıylı dógerekte turaqlı túrde jumıslar alıp barılmaqta.

Házirgi kúnde “Bárkamal áwlad” balalar mektebindegi 60 dógerekte 2366 bala qatnasıp, óz qábiletin hám qızıǵıwshılıǵın rawajlandırmaqta.

Dógerekler arasında shaxmat-shashka, jas aspaz, rus tili, shańaraq miyirbiykesi, floristika hám fauna, zergerlik hám bijuteriya, pishiw-tigiw, kompyuter grafikası hám dizayn sıyaqlı baǵdarlar bar. Sonday-aq, jáne bir qatar dógerekler de jaslar xızmetinde.

Mektepte jaratılǵan sharayatlar balalardıń bilim hám qábiletin kórsetiwine, olardı jańa kásiplerge qızıqtırıwǵa keń imkaniyat jaratpaqta. Sabaqlar tájiriybeli qánigeler tárepinen ótkeriledi hám hár bir balaǵa ayrıqsha qatnasta boladı.

Bul dógerekler jaslardıń dóretiwshilik pikirlewin rawajlandırıw, bos waqtın mazmunlı ótkeriw hám keleshekte qánige bolıp jetilisiwine tiykar jaratıp bermekte.

Qaraqalpaqstan xabar agentligi