Tórtkúl rayonında jol-transport infrastrukturasın jetilistiriw, xalıq hám miymanlar ushın qáwipsiz jáne qolaylı háreketleniw sharayatın jaratıw maqsetinde ámeliy jumıslar izbe-iz dawam ettirilmekte.

Ásirese, rayonda úlken áhmiyetke iye bolǵan D-154 avtomagistralınıń texnikalıq jaǵdayın jaqsılaw boyınsha keń kólemli ońlaw jumısları alıp barılmaqta. Bul joldaǵı kemshiliklerdi saplastırıw jumısları Tórtkúl rayonlıq jollardan paydalanıw mámleketlik mákemesi xızmetkerleri tárepinen ámelge asırılmaqta.

Jol ońlaw procesinde zamanagóy qurılmalar hám texnikalardan paydalanılmaqta. Maman qánigelerdiń qatnasıwında jol qaplamasındaǵı oyıqlar, jarıqlar hám basqa da texnikalıq kemshilikler tolıq saplastırılmaqta. Bul bolsa jol háreketi qatnasıwshıları ushın qáwipsizlik dárejesin arttırıwǵa xızmet etpekte.

Sonday-aq, jol ońlaw jumıslarınıń nátiyjesi sıpatında keleshekte D-154 jolın jedel háreketleniwge mólsherlengen, turaqlı hám bekkem jaǵdayǵa keltiriliwi rejelestirilgen. Bul xalıqqa qolaylıq jaratıw menen birge, rayonnıń ekonomikalıq hám sociallıq rawajlanıwına da unamlı tásir kórsetedi.

Jol qurıwshılar tárepinen alıp barılıp atırǵan pidákerlik miynet nátiyjesinde jańalanǵan jollar jaqın kúnlerde paydalanıwǵa tapsırılıwı kútilmekte.

Qaraqalpaqstan xabar agentligi