Bryusselde Bajıxana komitetiniń baslıǵı A.Mavlonovtıń Jáhán bajıxana shólkeminiń Bas xatkeri Yan Sonders penen ushırasıwı bolıp ótti.

186 mámleketten delegaciyalar qatnasıp atırǵan bul sessiyada Jáhán bajıxana shólkeminiń Bas xatkeri bar imkaniyatlardan kelip shıǵıp, tek ǵana onǵa shamalas mámleket bajıxana xızmetiniń basshıları menen eki tárepleme ushırasıw ótkere alatuǵının ayrıqsha atap ótiw kerek.

Bul mámleketler qatarında Ózbekstannıń da bar ekenligi bajıxana tarawında ámelge asırılıp atırǵan izbe-iz reformalar shólkemniń turaqlı dıqqat orayında turǵanın ańlatadı.

Ózbekstan Jáhán bajıxana shólkemi hám Shveycariya ekonomikalıq birge islesiw shólkeminiń Sawdanı qollap-quwatlaw globallıq Baǵdarlamasında belsene qatnaspaqta.

Baǵdarlamanıń 2024-2027-jıllarǵa mólsherlengen ekinshi basqıshı transshegaralıq sawda tártip-qaǵıydaların ápiwayılastırıw, sawda qárejetlerin azaytıw, bajıxana rásmiylestiriwi nátiyjeliligin arttırıwǵa qaratılǵan bir qatar ilajlardı názerde tutadı.

Sonday-aq, Jáhán bajıxana shólkemi hám Yaponiya xalıqaralıq birge islesiw agentliginiń birgeliktegi joybarları sheńberinde qáwip-qáterlerdi basqarıw hám tovarlardı shıǵarıw waqtın úyreniw boyınsha 10 ǵa shamalas seminarlarǵa Bajıxana komitetiniń xızmetkerleri belsene qatnastı.

Bajıxana komiteti xızmetkeri Sh.Niyazovtıń JBSh xalıqaralıq eksperti  statusın qolǵa kirgizgeni óz-ara birge islesiwdiń ámeliy nátiyjesi sıpatında tán alındı.

Komitet baslıǵı kelesi jılı bolıp ótetuǵın Jáhán bajıxana shólkeminiń kinologiya boyınsha global forumın Ózbekstanda ótkeriw hám “Aqıllı bajıxana” koncepciyası sheńberinde óz-ara birge islesiwdi bunnan bılay da keńeytiw usınısların alǵa qoydı.

Ushırasıwda tárepler óz-ara birge islesiwdiń keleshektegi bir qatar baǵdarların belgilep aldı.

Sh.Mamaturopova, ÓzA