Paytaxtımızda “Euronews” telekanalınıń Tashkent ofisiniń ashılawına baǵıshlanǵan saltanatlı ilaj bolıp ótti.
Bul ilajǵa Ózbekstan Respublikası Prezidenti Administraciyasınıń juwapkerleri, sırt el hám elimiz ǵalaba xabar qurallarınıń xızmetkerleri, elimizde jumıs alıp barıp atırǵan diplomatiyalıq korpus hám xalıqaralıq shólkemlerdiń wákilleri mirát etildi.
Hámmemizge belgili, Prezidentimiz Shavkat Mirziyoev 27-iyun – Baspasóz hám ǵalaba xabar quralları xızmetkerleri kúni múnásibeti menen taraw xızmetkerlerine jollaǵan qutlıqlawında global jámiyetlik-siyasiy processler sheksiz tez pát penen ózgerip atırǵan házirgi oǵada quramalı hám tınısh emes dúnyada ǵalaba xabar qurallarınıń ornı hám tásiri hár qashanǵıdan da kúshli áhmiyetke iye ekenin ayrıqsha atap ótti.
Usı mánide búgingi kúnde elimiz media mákanında dúnyanıń jetekshi ǵalaba xabar quralları menen tıǵız birge islesiwdi keńnen jolǵa qoyıw máselesine ayrıqsha itibar qaratılmaqta.
Ofistiń ashılıw máresiminde atap ótilgenindey, sońǵı jılları dúnyaǵa jańalanıp atırǵan Ózbekstan sıpatında tanılıp atırǵan mámleketimizde kóplegen sırt el media strukturaları nátiyjeli jumıs alıp barmaqta. Házirgi waqıtta jetekshi málimleme agentlikleri, telekanallar sırt eldegi ǵalaba xabar quralları menen tıǵız birge islesiwdi jolǵa qoymaqta. Bul bolsa málimleme dúnyadaǵı media materiallar almasıwında, aldıńǵı jumıs tájiriybelerin ǵalaba en jaydırıwda, elimizdegi waqıyalardı jedel hám ornında sáwlelendiriwde úlken áhmiyetke iye.
Usı telekanal Direktorlar keńesiniń baslıǵı Pedro Vargas Davidtıń atap ótiwinshe, “Euronews”tiń Tashkent ofisiniń ashılıwı ayrıqsha áhmiyetke iye bolıp, bul mámleketlerimiz arasında ózine tán media kópir wazıypasın atqaratuǵınına gúman joq. Sonı da aytıw kerek, “Euronews” bul tek ǵana málimleme mákanı emes, al mádeniyatlar, civilizaciyalardıń óz-ara baylanıs ornatqan, tutasqan mákanı bolıp esaplanadı.
Ózbekstan Respublikası Prezidentiniń Baspasóz xatkeri Sherzod Asadov keyingi jılları mámleketimizde jámiyetlik turmıstıń barlıq tarawları sıyaqlı baspasóz hám sóz erkinligin ámelde támiyinlew, ǵalaba xabar quralları xızmetkerleriniń erkin hám nátiyjeli jumısı ushın barlıq zárúr sharayatlar menen imkaniyatlar jaratılıp atırǵanın atap ótti. Házirgi waqıtta jurnalistika tarawında da xalıqaralıq birge islesiw baylanısları barǵan sayın keńeyip barmaqta.
“Euronews” tiń Tashkentte ofisi ashılıwı elimizdegi reformalar, jańalanıw processlerin dúnya kóleminde keńirek sáwlelendiriw imkaniyatın beretuǵını sózsiz.
– Búgingi globallasıw dáwirinde dúnyanıń hesh bir mámleketi málimleme mákanında da óz aldına jumıs isley almaydı, – dedi BMShtıń Ózbekstandaǵı turaqlı koordinatorı Sabine Maxl. – Ózbekstan barlıq mámleketler sıyaqlı Evropa Awqamı mámleketleri menen de nátiyjeli birge islesiwdi jolǵa qoyǵan. “Euronews”tiń Tashkenttegi ofisiniń ashılıwı Evropa mámleketleri menen óz-ara sóylesiwdi támiyinlewge qaratılǵan platformaǵa aylanadı.

Haqıyqatında da, Evropa Awqamınıń eń jetekshi telekanallarınan bolǵan bul media struktura kún dawamında úzliksiz málimleme – video hám audio kontentlerdi tayarlap tarqatatuǵın ǵalaba xabar quralı bolıp esaplanadı. Bul telekanal dúnyanıń onnan aslam tilinde xabar tarqatadı.
Saltanatlı ilajda “Euronews” xabarshıları tárepinen Ózbekstanda bolıp atırǵan jańalanıw processleri, reformalar, keń kólemli ózgerislerge baylanıslı videoreportajlardan kórinisler menen tanısıw imkaniyatı jaratıldı.
Ilajda kórkem óner sheberleri hám atqarıwshı jaslardıń qatnasıwında koncert baǵdarlaması qoyıp berildi.

Nazokat Usmonova, ÓzA xabarshısı