Áyyemgi hám gózzal Xiywa qalasında Birinshi Ózbekstan-Ázerbayjan parlamentleraralıq forumı bolıp ótpekte.

“Jańa imkaniyatlarǵa qaray: sóylesiwden birgeliktegi háreketlerge shekem” atamasında ótip atırǵan abıraylı ánjuman eki mámleket arasındaǵı strategiyalıq birge islesiwdi jáne de tereńlestiriw, parlamentleraralıq sóylesiwdi sapa jaǵınan jańa basqıshqa kóteriwge qaratılǵan.

Eki mámleket arasında diplomatiyalıq qatnasıqlar ornatılǵanınıń 30 jıllıǵı aldında ótkerilip atırǵan ánjumanǵa Ózbekstan Respublikası Oliy Majlisi hám Ázerbayjan Respublikası Milliy Mejlisi aǵzaları jáne eki mámlekettiń jaslar parlamentleriniń wákilleri, ǵalaba xabar qurallarınıń xızmetkerleri qatnaspaqta.

Oliy Majlis Senatınıń Baslıǵı Tanzila Norboeva Birinshi Ózbekstan-Ázerbayjan parlamentleraralıq forumı – bul tek ǵana tariyxıy waqıya emes, al eki mámleket parlamentleraralıq birge islesiwin jańa basqıshqa alıp shıǵatuǵın áhmiyetli platforma ekenin atap ótti. Bar imkaniyatlardan tolıq paydalanıw hám Parlamentleraralıq komissiya shólkemlestiriw arqalı eki tárepleme baylanıslardı jańa basqıshqa alıp shıǵıwımız kerek. Bul forum Ózbekstan sırtqı siyasatı ashıq-aydınlıq, doslıq hám turaqlı rawajlanıwǵa qaratılǵanınıń jáne bir ayqın kórinisi bolıp tabıladı.

Ázerbayjan Milliy Mejlisi Baslıǵı Sahiba Gafarova mámleketlerimiz basshılarınıń siyasiy erk-ıqrarına tiykarlanǵan, mámleketlerimiz arasındaǵı doslıqqa súyengen parlamentleraralıq formatta birge islesiwdiń jańa beti ashılıp atırǵanın atap ótti. Parlamentlerimiz jańa formatta mámleketleraralıq qatnasıqlardı tereńlestiriw hám hár tárepleme rawajlandırıwǵa túrtki beredi. Nızamshılıq, biznes hám ekonomika kesilispesinde turǵan tema – kishi hám orta biznesti qollap-quwatlaw, sonday-aq, mámleketlerimizdegi investiciyalıq ortalıqtı jaqsılaw. Bul tek ǵana ekonomikalıq emes, al sociallıq turaqlılıqqa da tikkeley baylanıslı máseleler bolıp esaplanadı. Bul máselelerdi sheshiw bolsa parlamentler aldında turǵan eń áhmiyetli wazıypalardan biri.

Forumda doslıq toparlarınıń jumısın keńeytiw, olardı parlamentleraralıq komissiyalar dárejesine alıp shıǵıw, birgeliktegi nızamshılıq baslamaların islep shıǵıw, jaslar baslamaların qollap-quwatlaw, sonday-aq, ekonomika, bilimlendiriw, densawlıqtı saqlaw, sanlı transformaciya hám ekologiya sıyaqlı tiykarǵı baǵdarlarda birge islesiwdi rawajlandırıw sıyaqlı máseleler dodalanbaqta.

Sonday-aq, aymaqlıq wákillikli uyımlar arasında tájiriybe almasıw mexanizmin engiziw, parlamentleraralıq birge islesiwdi bekkemlew hám sociallıq, ekonomikalıq rawajlanıwdaǵı hár qıylı qatnaslardıń nátiyjeliligin arttırıw ushın áhmiyetli qádem esaplanadı. Bul baslama jergilikli dárejedegi nızamshılıq uyımları arasında bilim hám tájiriybe almasıwǵa, mashqalalardı sheshiwde jańasha qatnaslar hám islesiw usılların engiziwge imkaniyat beredi. Nátiyjede hár bir aymaqta unamlı ózgerisler jaratıw ushın qolaylı sharayatlar jaratıladı.

Forum sheńberinde ótkeriletuǵın panel sessiyalar da usıǵan qaratılǵan. Olar arasında parlamentlerdiń roli, nızamnıń orınlanıwın qadaǵalaw, biznes hám investiciyalıq ortalıqtı jaqsılaw, sanlı reformalar, mádeniyat hám turizm tarawlarındaǵı baylanıslar, qorshaǵan ortalıqtı qorǵaw jáne hayal-qızlar hám jaslardıń jámiyettegi ornı sıyaqlı temalar keńnen dodalanadı.

Norgul Abduraimova,

ÓzAnıń xabarshısı