Bahalı metallarǵa baylanıslı huqıqbuzarlıqlar haqqında xabar bergen shaxslar xoshametlenedi. Bul boyınsha Prezidenttiń PQ-207-sanlı qararı qabıl etildi.

Qararǵa bola, 2026-jıl 1-yanvardan tómendegiler biykar etiledi:

– bahalı metallar hám bahalı taslardan islep shıǵarılǵan zergerlik buyımları hám yarım tayar ónimlerdi realizaciyalaw boyınsha aylanıstı QQStan azat etiwge baylanıslı jeńillik;

– altınnan islengen zergerlik buyımların usaqlap satqanı ushın jıyım.

2028-jıl 1-yanvarǵa shekem zergerlik buyımların islep shıǵarıw yaki olardı satıw jumısı menen shuǵıllanıwshı isbilermenlerge QQStıń  80 procenti hár aydıń 25-sánesine shekem avtomat túrde respublikalıq byudjetten qaytarıladı.

2025-jıl 1-sentyabrden:

– Jeke menshik isbilermenlerge zergerlik buyımların satıw jumısı menen shuǵıllanıwǵa ruxsat beriledi;

– Mámleketlik túp nusqalıq dárejesin qadaǵalaw inspekciyası tárepinen Tashkent hám Nókis qalaları hám wálayatlar oraylarında zergerlik buyımlarınıń túp nusqalıq  dárejesin tekseriw hám olardı tamǵalaw boyınsha kóshpeli xızmet kórsetiw jolǵa qoyıladı;

– bahalı metallar hám bahalı taslar haqqındaǵı huqıqbuzarlıqlar haqqında “Soliq” mobil qosımshası arqalı xabar bergen shaxslarǵa óndirilgen járiyma muǵdarınıń 50 procenti muǵdarında sıylıq tólenedi.

Aldın, kontrafakt hám tutınıwǵa jaramsız tovarlar aylanısına baylanıslı huqıqbuzarlıqlar haqqında xabar bergen shaxslar xoshametlenetuǵını haqqında xabar berilgenin esletip ótemiz,-dep málimleme beredi xabar.uz saytı.

Qaraqalpaqstan xabar agentligi