Sońǵı jılları elimizde joqarı bilimlendiriw sistemasında ámelge asırılıp atırǵan keń kólemli reformalar nátiyjesi ózin kórsete basladı. Bilimlendiriwdiń sapasın arttırıw, ilimiy-izertlew jumısın rawajlandırıw hám xalıqaralıq reytinglerde múnásip orın iyelew boyınsha izbe-iz ilajlar nátiyjesinde elimizdiń joqarı bilimlendiriw mákemeleri global maydanda belsene qatnaspaqta. Sonıń ishinde, Times Higher Education Impact Rankings 2025 reytinginde Ózbekstannıń 59 JOO qatnastı hám olardıń kópshiligi hár qıylı baǵdarlarda unamlı nátiyjelerdi kórsetti.

Bul reytingte Áliysher Nawayı atındaǵı Tashkent mámleketlik ózbek tili hám ádebiyatı universiteti jetekshi orınlardan birin iyelep, Ózbekstan JOOları arasında ajıralıp turdı. Universitet ulıwma 80,5 ball menen 2318 joqarı bilimlendiriw mákemeleri arasında 201-300-orınlardıń qatarınan orın aldı, dep xabar bermekte usı joqarı oqıw ornınıń málimleme xızmeti.
Ásirese, gender teńligin támiyinlew baǵdarında TashMÓTÁU jáhán universitetleri arasında TOP-20 lıqqa kirip, joqarı kórsetkishke eristi. Sapalı bilim beriw (SDG 4) boyınsha bolsa 23-orın, kámbaǵallıqtı saplastırıw (SDG 1) boyınsha 101-200-orınlardı iyeledi.
Bunnan 9 jıl aldın shólkemlestirilgen TashMÓTÁU qısqa waqıt ishinde tek ǵana respublikalıq emes, al xalıqaralıq reytinglerde de óz ornın taptı. Universitet BMShtıń Turaqlı rawajlanıw maqsetlerine muwapıq ilimiy-izertlew, sociallıq juwapkershilik hám bilimlendiriw tarawında izbe-iz jumıs alıp barmaqta.
TashMÓTÁU 2022-jılı bul reytingte 800+ orınlar qatarında qórsetilgen bolsa, 2023-jılı 600+ orınlar, 2024-jılı bolsa 301-400-orınlar aralıǵında bolǵanlıǵın atap ótiw orınlı. 2025-jılǵı reytingte bolsa jáne de joqarı nátiyjelerge erisken universitet búgingi kúnde mámleketimizdegi jetekshi joqarı oqıw orınlarınan biri sıpatında tán alınbaqta.
Bunday nátiyjeler Ózbekstan joqarı bilimlendiriw mákemeleriniń global kólemde básekige shıdamlı bolıp, ámelge asırılıp atırǵan reformalardıń ámeliy nátiyjesin ayqın kórsetpekte.

N.Usmonova, ÓzA