Mámleketimizde Jaslar siyasatı boyınsha alıp barılıp atırǵan keń kólemli jumıslar dúnya kóleminde tán alınbaqta. Usınday iygilikli maqsetler jolında alıp barılıp atırǵan ilajlar nátiyjesinde búgin jaslarımız bilimlendiriw hám ilimde, sportta, IT tarawında, jaqsı nátiyjelerge erisip, isbilermenlikte tabısları menen kózge túspekte.

Xojeli rayonı hákimliginde “Hákim hám jaslar” ushırasıwı ótkerildi. Erkin pikirlesiw, ashıq sáwbet tárizinde ótkerilgen ilajǵa rayon hákimi J.Ermashev, Mámleketlik qáwipsizlik xızmeti rayon bólimi baslıǵı B.Eshbekov, rayon prokurorı A.Xalimov, jaslar hám olardıń ata-anaları qatnastı. Sózge shıqqanlar mámleketimizde jaslarǵa bolǵan itibar jıldan-jılǵa artıp, olardı hár tárepleme qollap-quwatlaw maqsetinde kóplegen imkaniyatlar jaratılıp atırǵanlıǵın atap ótti.
Ushırasıw dawamında Ministrler Kabinetiniń 2019-jıl 22-fevral kúngi «Ulıwma orta bilimlendiriw mákemeleri hám akademiyalıq liceyler pitkeriwshilerin xoshametlewdi jáne de jedellestiriw ilajları haqqında»ǵı 154-sanlı qararı tiykarında mekteplerdegi qábiletli pitkeriwshilerge 18 altın hám 8 gúmis medalları saltanatlı túrde tapsırılıp, olardıń ata-analarına rayon hákimligi tárepinen minnetdarshılıq bildirildi. Bunnan soń, jaslarımız ózleriniń pikirleri menen ortaqlasıp, basshılarǵa bir qansha jańa joybarlardı usınıs etti. Olar óz gezeginde basshılar tárepinen maqullanıp, anıq wazıypalar belgilep alındı.
Rayon hákiminiń jaslar menen ashıq tárizde ótkerilgen sáwbeti ǵalaba xabar quralları wákilleriniń názerinde bolıp, rayon aymaǵında jaslardıń bántligin támiyinlew, olardıń bos waqıtların mazmunlı shólkemlestiriw boyınsha ámelge asırılıp atırǵan jumıslar haqkında bir qansha maǵlıwmatlarǵa iye boldı. Bárshemizge belgili zamanımız tez pát penen rawajlanıp atırǵan házirgi waqıtta baspasóz hám ǵalaba xabar quralları xızmetkerleriniń ornı áhmiyetli. Ásirese, rayon turmısınıń sociallıq-ekonomikalıq ózgerisleri, reformalar hám jańalıqlar jurnalistlerdiń miyneti arqalı keń jámiyetshilikke jetip barmaqta. Usınday jumıslardı jarıtıwda belsendilik etip kiyatırǵan kásip iyelerine «27-iyun – Baspasóz hám ǵalaba xabar quralları xızmetkerleri kúni» múnásibeti menen rayon hákimi J. Ermashev tárepinen minnetdarshılıq bildirildi.
Ilaj «Jaslar kúni» ne arnalǵan «Jańa Ózbekstan jasları, birleseyik!» atamasındaǵı koncert baǵdarlaması menen dawam etti.
Onda rayon hákimi Jeńis Ermashev qatnasıp, barlıq jaslardı qızǵın qutlıqladı hám keleshekte úlken jetiskenliklerge erisiwin tiledi. Saltanatlı keshe dawamında belgili estrada juldızlarınıń atqarıwında kewilli nama-qosıqlar hám ayaq oyınlar atqarılıp, xalqımızǵa bayram keypiyatın baǵıshladı.

Qaraqalpaqstan xabar agentligi