Paytaxtımızdaǵı «Ózbekstan» xalıqaralıq ánjumanlar sarayında 27-iyun – Baspasóz hám ǵalaba xabar quralları xızmetkerleri kúni múnásibeti menen bayram ilajı hám «Altın qálem» XIX Milliy sıylıǵı ushın xalıqaralıq tańlaw jeńimpazları hám sıylı orın iyelerin saltanatlı sıylıqlaw máresimi bolıp ótti.

Usı múnásibet penen bul sawlatlı sarayǵa taraw wákilleri, ustaz jurnalistler, media tarawında xızmet etip atırǵan dóretiwshiler, baspa hám poligrafistler, jurnalistika baǵdarındaǵı joqarı oqıw orınlarınıń professor-oqıtıwshıları, ilimpaz hám izertlewshiler mirát etildi.
Ózbekstan Respublikası Prezidenti Shavkat Mirziyoevtiń Baspasóz hám ǵalaba xabar quralları xızmetkerlerine jollaǵan qutlıqlawın Ózbekstan Respublikası Prezidentiniń Baspasóz xatkeri Sherzod Asadov oqıp esittirdi.
Media tarawı wákilleriniń kásiplik bayramı aldınan Ózbekstan Respublikası Prezidentiniń «Baspasóz hám ǵalaba xabar quralları xızmetkerleri kúni múnásibeti menen taraw xızmetkerlerinen bir toparın sıylıqlaw haqqında»ǵı pármanı qabıl etildi. Oǵan bola, demokratiyalıq reformalardı tereńlestiriw, puqaralardıń málimleme tarawındaǵı konstituciyalıq huqıqların támiyinlew, sóz hám baspasóz erkinligi, ashıq-aydınlıq principin bekkemlewge qosıp atırǵan múnásip úlesi, global málimleme maydanında milliy máplerimizdi qorǵaw, Jańa Ózbekstanda erisilip atırǵan jetiskenliklerdi keńnen úgit-násiyatlawdaǵı úlken xızmetleri, joqarı mamanlıqtaǵı, zamanagóy jurnalist kadrlardı tayarlaw, jas áwladtı watanǵa muhabbat hám sadıqlıq ruwxında tárbiyalawdaǵı nátiyjeli jumısı hám jámiyetlik turmıstqa belsene qatnasqanı ushın bir topar kásipleslerimiz Watanımızdıń joqarı ataqları, orden hám medalları menen sıylıqlandı.
Saltanatlı ilajda Ózbekstan Respublikası Oliy Majlisi Senatınıń Baslıǵı Tanzila Norboeva áne, usı sıylıqlardı óz iyelerine tapsırdı.
Ózbekstan Respublikasında xızmet kórsetken jurnalist, «Yangi Wzbekiston» hám «Pravda Vostoka» gazetaları redakciyasınıń bas redaktorı, ustaz dóretiwshi Salim Doniyorov, «Shuhrat» medalınıń iyeleri, «Gazeta.uz« internet basılımınıń redaktorı Elina Sakaeva, «Kamoliddin Rabbimov» telegram kanalınıń tiykarın salıwshısı, siyasattanıwshı hám bloger Kamoliddin Rabbimov tarawdıń rawajlanıwına kórsetilip atırǵan itibar ushın Prezidentimizge minnetdarshılıq bildirdi.
Mámleketimiz basshısınıń baslaması menen mámleketimizde bolıp atırǵan jedel ózgerisler procesi milliy media tarawın da unamlı mánide túp-tiykarınan ózgertip jiberdi. Sóz hám baspasóz erkinligin ámelde támiyinlew, bul baǵdarda puqaralardıń konstituciyalıq huqıqları menen erkinliklerin júzege shıǵarıw, barlıq túrdegi ǵalaba xabar quralların jedel rawajlandırıw ushın zárúr barlıq sharayatlar menen imkaniyatlar tolıq jaratılmaqta. Házirgi waqıtta jurnalistlerimizdiń dúnya jámiyetshiligi menen teń qádem taslawı, jáne de erkin, nátiyjeli, keń kólemli jumıs alıp barıwı jolında barlıq imkaniyatlar iske qosılmaqta.

Saltanatlı ilajda milliy baspasózimiz, baspa jumısı, ǵalaba xabar quralların rawajlandırıwǵa kórsetilip atırǵan itibar haqqında hár tárepleme sóz etildi.
Haqıyqatında da, búgin belsendi hám pidayı jurnalistlerdiń jar salıwı nátiyjesinde kóterilip atırǵan mashqalalarǵa jedellik penen itibar qaratılıp, olarǵa óz waqtında hám unamlı sheshim tabılmaqta. Bul baǵdarda jáne de isenimli hám intaker bolıw zárúr ekenligi haqqındaǵı ideya Prezidentimiz tárepinen alǵa qoyılıp atırǵanı dóretiwshilerge barǵan sayın kóbirek ilham baǵıshlamaqta. Bul bolsa milliy baspasózimizde, internet basılımlarında, televidenie hám radio arqalı berilip atırǵan materiallardıń jáne de ráńbáreń, qızıqlı, áhmiyetli, sociallıq áhmiyetke iye bolıwın támiyinlewde áhmiyetli faktor bolmaqta.
Haqıyqatında da, búgingi pidayı, miynetkesh, millet, Watan, xalıq máplerin ózinen de joqarı qoyatuǵın jurnalistlerdi elimizdiń keleshegi ushın janın pidá etken jadid babalarımızǵa salıstırsaq, hesh qanday asıra aytqan bolmaymız. Sebebi, milliy jurnalistikamızdıń dańqlı tariyxı, onıń rawajlanıwı óz táǵdirin Watannıń, el-xalıqtıń táǵdiri aǵartıwshı jadid babalarımızdıń jumısı, ibratlı háreketleri menen óz-ara baylanıslı.
Saltanatlı ilajda «Altın qálem» Milliy sıylıǵı shólkemlestiriw komitetiniń baslıǵı, Ózbekstan Jurnalistler awqamınıń baslıǵı wazıypasın atqarıwshı Xolmurod Salimov mámleketimizde Prezident Shavkat Mirziyoevtiń basshılıǵında málimleme tarawında keń kólemli reformalar alıp barılıp atırǵanı, jurnalistlerdiń jámiyettegi belsendiligin arttırıw, olardı qollap-quwatlaw hám xoshametlewge ayrıqsha itibar qaratılıp atırǵanına toqtap ótti, bıyılǵı «Altın qálem» sıylıǵı haqqında maǵlıwmat berdi.
«Altın qálem» XIX Milliy sıylıǵı ushın xalıqaralıq tańlawda 499 jurnalist hám ǴXQ wákilleri 3 mıń 251 den aslam dóretiwshilik jumısları menen qatnasqan. Bul óz gezeginde, jámiyette júz berip atırǵan ózgerisler, jańalanıwlar procesinde jurnalistlerdiń belsendiligin kórsetedi.
Prezidentimizdiń 2022-jıl 27-iyundegi «Ǵalaba xabar quralların qollap-quwatlaw hám jurnalistika tarawın rawajlandırıw ilajları haqqında»ǵı qararınıń orınlanıwı sheńberinde 2023-jıldan baslap «Altın qálem» tańlawınıń xoshametlewshi nominaciyaları 5 ten 12 ge kóbeytildi.
Usı qararǵa muwapıq, 1-orın iyesi Ózbekstanda belgilengen bazalıq esaplawdıń 200 esesi, 2-orın iyesi 175 esesi, 3-orın iyesi 150 esesi muǵdarında aqshalay sıylıq beriledi. Sonday-aq, 12 xoshametlewshi nominaciyanıń hár bir jeńimpazı bazalıq esaplaw muǵdarınıń 100 esesi muǵdarında aqshalay sıylıq penen sıylıqlanadı.
Jurnalistler arasında dástúriy tárizde ótkerilip kiyatırǵan «Altın qálem» Milliy sıylıǵı ushın xalıqaralıq tańlawı demokratiyalıq principler tiykarında jáne de ashıq-aydın ótiwin támiyinlew maqsetinde hár jılı tańlawdıń Tóreshiler quramına baǵdarlar boyınsha ustaz jurnalistler, media tarawdıń belgili wákilleri kirgiziledi. Usınılǵan dóretiwshilik jumıslar bolsa temanıń sociallıq áhmiyeti, jurnalisttiń puqaralıq poziciyası, sın kózqarastan tallaw, sózge juwapkershilik hám bildiriw sheberligi, dóretiwshilik jumısqa jańasha qatnas sıyaqlı normalar tiykarında qalıs bahalandı.
Ilajda «Altın qálem» Milliy sıylıǵına miyasar bolǵan kásipleslerimizge aqshalay sıylıqlar, diplomlar, arnawlı statuetkalar tapsırıldı. Bas sıylıq «Gulxan» jurnalı redakciyasına (bas redaktor Zahro Hasanova) nesip etti.
– Mámleketimizde jurnalistika tarawına, ásirese, balalar ushın sapalı, mazmunlı kontent tayarlawǵa úlken itibar qaratılmaqta, – dedi «Gulxan» jurnalınıń bas redaktorı Zahro Hasanova. – Bul itibar taraw xızmetkerlerin jáne de ilham menen dóretiwshilikke iytermeleydi. Balalar basılımlarına bolǵan itibar keleshekke bolǵan itibar, degeni. Solay eken, keleshegimiz álbette jarqın boladı.
Saltanatlı ilajǵa Ózbekstan Respublikası Prezidentiniń keńesgóyi Xayriddin Sultonov, Ózbekstan Respublikası Oliy Majlisi Nızamshılıq palatasınıń Spikeri Nuriddin Ismoilov qatnastı.
Ilajda muzıkalıq baǵdarlama kórsetildi.

Nazokat Usmonova,
ÓzAnıń xabarshısı